"Azərbaycanda ictimai qınaq məsələsi arzuolunan şəkildə deyil”.
Bunu "Sherg.az”a psixoloji problemləri olan şəxslərin yaxınları tərəfindən ruhi dispanserlərə yerləşdirilməməsinin səbəblərini izah edərkən sosioloq Əhməd Qəşəmoğlu deyib.
O bildirib ki, insanlar ictimai qınaqdan çəkindiyindən, yaxud bu xəstəlikdən əziyyət çəkən yaxınlarına "qıymadığına” görə onları xəstəxanalara yerləşdirmir:
"İnsanların az olduğu dövrdə adət-ənənələr formalaşmışdı. İnsanların cəmiyyətdə sayı artdıqca, vəziyyət də çətinləşir. Mürəkkəbləşən cəmiyyətdə formalaşmış dəyərlərə, ictimai qınaqlara yenidən baxmaq zərurəti yaranıb.
Doğrudan da, insanlar düşünür ki, psixi problemi olan yaxınlarını həkimə aparsalar, deyəcəklər filankəsin uşağı dəlidir, psixdir.
Bu faktlar əvvəllər qıcıqla qarşılanırdı. Amma bunun təhlükə mənbəyi olduğunu biliriksə, həkimə mütləq müraciət etməliyik. İctimai təhlükəli, başqalarına zərər vuran insanları mütləq cəmiyyətdən təcrid etmək lazımdır. Onların ciddi müalicəsi ilə əlaqədar müəssisələrdə məşğul olmaq gərəkir.
Lakin ictimai təhlükəli olmayan psixoloji xəstəliklərə malik şəxsləri ev şəraitində də müalicə etmək olar. Ona görə, bu sahədə maarifləndirmə aparmalıyıq.
Ortada utanmalı, çəkinməli məsələ yoxdur. Belə xəstəliklərlə üzləşən, yaxud yaxınları bu cür psixi problemlərdən əziyyət çəkən şəxslər ona dırnaqarası baxanları qınamalıdır.
Xəstəsi olanı deyil, buna gülənləri qınaq obyekti etmək lazımdır”.
Qeyd edək ki, bir neçə gün əvvəl Şəkidə 1938-ci il təvəllüdlü Nüvər İbrahimxəlil qızı Sadıqova qız nəvəsi tərəfindən qətlə yetirilib. Məlum olub ki, cinayəti törədən 30 yaşlı Reyhan Davudova ruhi xəstədir və xəstəliyi ilə bağlı bir neçə dəfə müalicə olunub. Hadisə baş verən vaxt R. Davudova evdə nənəsi ilə tək olub. O, ilk öncə nənəsini boğub, daha sonra çəkiclə qoca qadının başına bir neçə dəfə zərbə endirib.
Aysel Aslan
