Prezident İlham Əliyev ölkədə sosial məsələlərin həllini, əhalinin rifahının yüksəlişini prioritet məsələ hesab edir və bu istiqamətdə ardıcıl tədbirlər həyata keçirir. Dövlət başçısı qaçqınların və məcburi köçkünlərin problemlərinin həllinə xüsusi qayğı ilə yanaşır, bu məsələni daim diqqət mərkəzində saxlayır. Qaçqınların və məcburi köçkünlərin sosial vəziyyətinin yaxşılaşdırılması, məşğulluqlarının artırılması və digər məsələlərlə bağlı mühüm işlər görülüb.
Dekabrın 27-də Sumqayıt şəhərində qaçqın və məcburi köçkün ailələri üçün inşa edilən yaşayış binaları kompleksinin açılışı deyilənlərin əyani sübutudur. Kompleksdə məktəb, uşaq bağçası, mərasim evi, polis məntəqəsi və digər zəruri infrastruktur obyektləri inşa edilib. Mənzillərin hamısı tam təmirlidir və mətbəx mebeli, qaz sobası ilə təchiz olunub. Son illərdə qaçqınlar və məcburi köçkünlər üçün bütün zəruri infrastrukturla təchiz olunmuş qəsəbələr salınıb, çoxmərtəbəli binalar inşa olunub.
Bundan başqa, ölkə başçısının 2018-ci il 19 aprel tarixli 1 nömrəli Fərmanına əsasən şəhid ailələrinin birdəfəlik ödəmə ilə təminatı sahəsində işlər davam edir. Artıq 3100 şəhidin 4200 vərəsəsinə birdəfəlik ödəmənin verilməsi barədə qərar qəbul olunub.
Ölkə başçısının sosial siyasəti hər zaman uğurla həyata keçirdiyini deyən "Tərxis Olunmuş Hərbçilərin Gəncləri Maarifləndirmə” İctimai Birliyinin sədri Emin Həsənli "Şərq”ə bildirib ki, məcburi köçkünlərin mənzillə təmin olunması, onların kommunal xərclərinin ödənilməsi, şəhid övladlarının təhsil haqlarından azad edilməsi, əlillərə yeni avtomobillərin verilməsi sistemli hal alıb:
"Dünyada elə bir ölkə yoxdur ki, orada bu cür geniş və əhatəli layihələr həyata keçirilsin. Bütün bunlar əhalinin vəziyyətinin yaxşılaşdırılması üçün nəzərdə tutulub. 1 milyondan artıq vətəndaşımız qaçqın və məcburi köçkündür. Dövlətimiz şəhid ailələrinə, 20 yanvar hadisəsinin iştirakçılarına, əlilliyi olan vətəndaşlara xüsusi diqqət və qayğı göstərir. Gələnilki dövlət büdcəsində də bu istiqamətə xeyli vəsait ayrılması nəzərdə tutulub.
Qaçqınlara mənzillərin verilməsi, şəhid ailələrinə köməkliklərin göstərilməsi üçün cənab Prezident hər zaman müvafiq göstərişlər verməkdədir. Hesab edirəm ki, bu günə qədər çoxlu sayda işlər görülüb və bundan sonra da görüləcək. Azərbaycan xalqı bu prosesləri görüb təhlil aparır və ölkə başçısının apardığı siyasəti dəstəkləyir”.
Qaçqın və Məcburi Köçkün Gənclər Təşkilatının sədri Vüqar Qədirlinin sözlərinə görə, ölkə başçısı əhalinin sosial qayğıya ehtiyacı olan təbəqəsinin maddi rifahının yüksəlməsi istiqamətində mühüm addımlar atır:
"Cənab Prezident 2003-cü ildə hakimiyyətə gələn vaxt bir dənə də olsun qaçqın şəhərciyinin qalmayacağını demişdi. Belə də oldu. Qısa bir müddətdə bütün qaçqın şəhərcikləri ləğv olundu və onların yerinə müasir tipli qəsəbələr, binalar tikildi, köçkünlərimiz həmin qəsəbələrə yerləşdirildi. Bu istiqamətdə uğurlu layihələr davam etdirilir. Demək olar ki, məcburi köçkünlərin hər biri müasir tipli yaşayış məntəqələrinə köçürülüb.
Həmçinin yeni infrastruktura malik yaşayış kompleksləri inşa edilməkdədir. Dekabr ayında Sumqayıtda və Abşeronda yeni tikilən qəsəbələrin açılışının şahidi olduq. Təbii ki, bu siyasət ölkə başçısı tərəfindən yalnız məcburi köçkünlərlə bağlı yox, həmçinin, şəhid ailələri, hərbiçilər, müharibə veteranları və digər kateqoriya ilə bağlı uğurla həyata keçirilir. Cənab prezidentin seçkilərdən dərhal sonra ilk bəyanatı şəhid ailələrinə verilən 11 min manatla bağlı sərəncamı oldu.
Əsas hədəfimiz işğal olunmuş torpaqlarımızın düşməndən alınmasıdır. Ölkə başçısının bu sahədə apardığı siyasət göz qabağındadır. Prezidentin xalqla həmrəyliyi onu deməyə əsas verir ki, torpaqlarımızı geri qaytaracağıq və sosial layihələri işğal altında olan torpaqları azad etdikdən sonra da davam etdirəcəyik”.
Yeganə Bayramova
