"Real həyatda ünsiyyətdə oluruq, virtual mühitdə də bu davam edir”.
Bunu "Sherg.az”a sosial şəbəkələrin vəd etdiyi mənfi və müsbət elementlərdən danışarkən media hüququ üzrə ekspert Ələsgər Məmmədli deyib.
O bildirib ki, sosial şəbəkələrin nə dərəcədə təhlükəli olması insanların özündən asılıdır:
"Sosial şəbəkələrdən istifadə təhlükə deyil. Sadəcə fiziki ünsiyyətin virtual aləmə daşınmasıdır. İstənilən halda, insanların özünü ifadə etməsi təhlükə ola bilməz. Lakin müəyyən qrup insanlar var ki, müxtəlif məlumatları dar çərçivədə yayırlar. Bu məsələdə bütövlükdə sosial şəbəkəni təhlükə aləmi kimi görmək yanlışdır.
Sosial şəbəkədən hansı məqsədlər üçün istifadə edilməsi başqa mövzudur. Düşünürəm ki, bəlli qruplar, xüsusilə təhsil yönümlü şəxslər daha az zaman sərf etməklə öz auditoriyalarına çıxırlar. Bu, vacib elementdir. Məsələn, mən özüm də sistemli şəkildə bu aspektdən sosial şəbəkəni istifadə edirəm. Həqiqətən faydalanmaq istəyiriksə, sosial şəbəkənin müsbət yönlərini görərik.
Qərb ölkələrində də sosial şəbəkələrin ziyanları haqqında məlumatlar dərc olunur. Lakin bunu ümumiləşdirmək, hər kəsin bu fikirdə olduğunu demək düzgün deyil.
Biz düşüncəmizin verdiyi imkanlarla, ağılla bu alətlərdən istifadə etdiyimiz müddətdə heç bir təhlükə yoxdur”.
Aysel Aslan
