"Maddiyyatı ilə öyünən insanların qınaq obyektinə çevirmək lazımdır".
Bunu Sherg.az-a Bakıda nömrəsi "555" olan bahalı avtomobillərin toy karvanı yaratmasına münasibət bildirərkən sosioloq Əhməd Qəşəmoğlu deyib.
Onun sözlərinə görə, indiki vaxtda bu yalnız bir sosial qrupun deyil, bütün cəmiyyətin problemidir:
"Dəfələrlə bu barədə müzakirələr olunub ki, maddiyyatı göz önünə sərmək, üstün həyatı reklam etmək kimi davranışlar artır. Bu cəmiyyətdə gərginliyi, kriminal vəziyyətləri, digər xoşagəlməz halların yaranmasına səbəb olur. Buna imkan verməmək üçün ictimai qınaq olmalıdır. Özünü göstərmək şəxsi məsələ deyil və cəmiyyətdə gərgin ovqatın yaranmasına səbəb olan addımlardır. Bütün ölkənin problemidir. Bu halları ictimai qınaq obyektinə çevirməklə imkanı nümayiş etdirməyin mənasız olduğunu göstərə bilərik.
O, cəmiyyət, o insan daha üstün sayılır ki, öz mədəniyyəti və əməli ilə seçilir. Cəmiyyətdə elə ovqat yaratmalıyıq ki, insanlar maddiyatı ilə öyünməyi mədəniyyətsizlik kimi dərk etsin. Elə gənclər özü də anlamalıdır ki, yalnız mədəniyyətində problem olan insan öz pulu ilə öyünür. Yüksək mədəniyyətli insan özünü maddiyyatı ilə reklam etməyə çalışmaz. Bu məsələlər ictimai qınaq obyektinə çevrilsə, cəmiyyəti xilas edə bilərik”.
Qeyd edək ki, Bakıda nömrəsi"555" olan bahalı avtomobillər toy karvanı yaradıb.
Ayyət
