"Təcili Tibbi Yardım maşınlarının hansı məqsədlə istifadə olunmasına nəzarət edilməlidir”.
Bunu "Sherg.az”a İmişlidə təcili tibbi yardım maşınının sərnişin marşrutu kimi istifadə olunmasına münasibət bildirərkən Təcili Tibbi Yardım Stansiyasının həkimi Şahvələd Məmmədov deyib.
O vurğulayıb ki, Bakı şəhərində fəaliyyət göstərən təcili tibbi yardım maşınları ciddi nəzarətdədir:
"Çox maşınlara GPS quraşdırılıb, sürücü maşını hara sürsə, nəzarət edən şəxslərin məlumatı olur. Rayon yerlərində təcili yardım maşınları müdiriyyətin nəzarətindən çıxır. Görünür, baş həkimin, müdiriyyətin nəzarətsizliyi ucbatından təcili yardım sürücüləri maşınları istədikləri yerə sürür.
Təcili Təxirəsalınmaz Tibbi Yardım maşınları heç vaxt meyit daşımaz. Bəzən hadisə yerindən çağırış edilir ki, ölüm hadisəsi baş verib, meyiti məscidə, yumağa aparmaq lazımdır. Təcili yardım maşınları bu məqsədlə istifadə olunmamalıdır”.
İnsanların, sıravi vətəndaşların təcili tibbi yardım maşınlarından istifadə məsələsində laqeydlik etdiyini diqqətə çatdıran Ş.Məmmədov maarifləndirmə aparılmasını üstün tutur:
"İnsanları xidməti maşınlardan təyinatı üzrə istifadə etməyə öyrətmək lazımdır. İctimai qınaq olmalıdır. Bu gün İmişlidə qanunsuzluq baş verib, sabah başqa rayonlarda da təcili yardım maşınlarını öz məqsədləri üçün istifadə edənlər olacaq. Mütləq bu problemi həll etmək lazımdır”.
Qeyd edək ki, İmişli rayonunda çəkilən videogörüntülər sosial şəbəkələrdə yayılıb. Videodan aydın olur ki, sakinlər təcili tibbi yardım maşınını sərnişin avtobusu kimi istifadə edirlər.
Aysel Aslan
