Hörmətli redaksiya! Yəqin, hər kəs etiraf edər ki, insanların birbaşa münasibətdə olduğu müəssisələrdə bizə qayğı ilə yanaşan, bizi səbrlə dinləyən işçilərə heç də hər yerdə rast gəlmirik. Bu gün dünyanın bir çox ölkələrinin təcrübəsindən istifadə etdiyi ASAN xidmət müəssisələrində adamlara göstərilən diqqət və qayğı artıq başqa qurumlara da sirayət etmişdir.
Mən aprelin 7-də Prezident təqaüdünün vaxtı bitmiş bankomat kartını yenidən bərpa etmək üçün Beynəlxalq Banka müraciət etdim. Çox tez bir vaxtda növbəm çatdı və mən bankın iki cavan əməkdaşının- Zərifə Cavadzadənin və Nərmin Əlizadənin xidmət masasına yaxınlaşdım. Bankın bu əməkdaşları mənimlə sual-cavabda o qədər aydın və qayğılı rəftar etdilər ki, mən bu xidmətdən çox məmnun qaldım. Təfərrüata varmadan deyim ki, onların məsələyə dəqiq yanaşmaları ilə bank xidmətinə görə mənim təqaüdümdən indiyədək bir faiz pul tutulmasını ləğv etdilər(Bunun əsasları var). Amma mən yaşlı bir adam kimi Zərifə xanıma və Nərmin xanıma ancaq müştəriyə göstərdikləri diqqət və qayğıya görə sizin qəzetin vasitəsilə təşəkkürümü bildirmək istərdim.
Cahangir Məmmədli, professor, Prezident təqaüdçüsü
