“Dövlət sahibkarın binasını məcburi şəkildə əlindən ala və sata bilməz. Ancaq hansısa bir təklif verə bilər”
Son günlər paytaxtda tikintisi yarımçıq qalan binaların aqibəti aktuallaşıb. Bakıda istifadəyə verilən çoxmərtəbəli evlərlə yanaşı, tikintisi yarımçıq qalmış binalar da az deyil. Xüsusən də neftin qiymətinin dünya bazarında ucuzlaşması fonunda ölkədə yaşanan iqtisadi böhrandan sonra Bakıda tikilməkdə olan bir sıra binaların inşası dayanıb.
Belə yarımçıq tikililər isə paytaxtın zahiri görkəmini eybəcərləşdirir. Dünya ölkələrinin təcrübəsində bu cür yarımçıq binalar ya hərraca çıxarılır, ya da dövlət tərəfindən satın alınır. Bundan sonra isə o binaların tikintisi başqa şirkətə həvalə edilir. Çünki zaman keçdikcə, yarımçıq tikili aşınmaya məruz qalır.
Bəs Bakıda tikintisi yarımçıq saxlanılmış çoxmərtəbəli binaların tamamlanması üçün hansı addımlar atılmalıdır?
İqtisadçı-ekspert Rəşad Əliyev isə "Şərq”ə açıqlamasında deyib ki, şəhərin infrastruktur görünüşünə xələl gətirən təkcə yarımçıq binalar deyil, zövqsüz tikilmiş yeni hazır binalar da kifayət gədərdir:
"O ki qaldı yarımçıq binalara, bu məsələ həm hüquqi, həm də iqtisadi müstəvidə həll olunmalıdır. Əvvəla o binalar niyə yarımçıq qalıb? Bunun səbəbləri araşdırılmalıdır. İkinci mərhələdə isə problemin həlli istiqamətində müvafiq addımlar atılmalıdır. Çünki binaların yarımçıq qalma səbəbləri individual ola bilər. Yəni hamısı eyni səbəbə görə yarımçıq qalmayıb.
Məsələn, birində tikinti dayandırıla bilər, hansısa qurum tərəfindən, birində maliyyə çətinliyi ilə bağlı tikinti dayandırıla bilər, birində ümumiyyətlə müflisləşmə olub. Buna görə də səbəblər konkret olaraq bir qurum tərəfindən çətin ki, aradan qaldırıla. Bu istiqamətdə kompleks iş olmalıdır”.
Milli Məclisin İqtisadi siyasət, sənaye və sahibkarlıq komitəsinin üzvü Vahid Əhmədov isə bildirib ki, Bakı şəhəri çoxlu turist qəbul etdiyi üçün yarımçıq binalar paytaxtın görünüşünə xələl gətirir. Buna görə də, onlarla bağlı siyahıyaalma aparılmalıdır:
"Yarımçıq binaların tamamlanması üçün müvafiq addımlar atılmalıdır. Bir vaxtlar kooperativ təşkilatlar Bakıda bəzi binalar tikib, yarımçıq saxlayıblar. Müəyyən özəl təşkilatlar da var ki, onların da inşa etdiyi xeyli sayda bina maliyyə çatışmazlığı səbəbindən yarımçıq qalıb. Belə binaların tamamlanması üçün Bakı Şəhər İcra Hakimiyyəti müəyyən qərar verməlidir. Yəni ya həmin binalar tikilib istifadəyə verilməlidir, ya da həmin binalara cavabdeh olan özəl təşkilatlar bir qərara gəlməlidir. Bunun çıxış yolu yalnız belədir. Bazar iqtisadiyyatı prinsipləri sahəsində hansı qanunlar varsa, ona uyğun da addım atılmalıdır”.(modern.az)
Vahid Əhmədovun sözlərinə görə, dövlət sahibkarın binasını məcburi şəkildə əlindən ala və sata bilməz:
"Ancaq hansısa bir təklif verə bilər. O cümlədən, Bakı Şəhər İcra Hakimiyyəti də sahibkara təklif verə bilər. Əgər həmin təklif sahibkara sərf etsə və razılığını versə, o zaman dövlət həmin binanı sata, ala və ya təmir edib yenidən istifadəyə verə bilər. Bu da hökumətlə, Bakı Şəhər İcra Hakimiyyətilə qurulmuş dialoqdan asılıdır”.
Şəymən
