“Elə otellər var ki, onlar 30 illik müştərilərinin olması ilə fəxr edirlər”
Azərbaycan Turizm Assosiasiyasının (AzTA) sədri Nahid Bağırovun sözlərinə görə, builki Novruz bayramında Azərbaycana gələn İran turistlərin sayı ötənilki bayrama nisbətən az olub. Assosiasiya sədri qeyd edib ki, İran turistlərindən fərqli olaraq, bu il bayram günlərində ərəb ölkələrindən gələn turistlərin sayında daha çox artım olub.
Turizmin inkişafı ölkə iqtisadiyyatına təkan verən əsas qüvvələrdən biri olduğu üçün, bu sahədə davamlı işlərin görülməsi vacibdir. Adətən bir ölkəyə səyahət edən turistlər növbəti il fərqli yerlərə getməyi planlaşdırır. Maraqlıdır, daha çox turistlərin ölkəmizə cəlb edilməsi üçün hansı addımlar atılmalıdır?
Turizm üzrə ekspert Eldar Aslanovun "Şərq”ə açıqlamasına görə, turistlərin sayını və artım tempini qorumaq üçün davamlı olaraq fərqli turist proqramlarının hazırlanması vacibdir:
"Düşünmürəm ki, İrandan gələn turistlərin sayında ciddi azalma var. Keçənilki turistlərin sayında artım o qədər çox olmuşdu ki, bu il də eyni dinamikanı gözləyirdik. Sosial-iqtisadi səbəblərdən, xüsusilə turist psixologiyası baxımından hər il ölkəmizə gələn turistlərin sayının eyni templə artmasını gözləmək yanlış olardı.
Çünki dünyada heç bir ölkədə belə şey yoxdur. Əsas məsələ turistlərin sayı ilə bağlı inkişaf dinamikasını sabit saxlamaqdır. Bunun üçün turizm çeşidliliyini artırmaq, turistlər üçün daha maraqlı paketlər təqdim etmək əsasdır. Gələn turist eyni ölkəyə ikinci dəfə gəlmək istəmir, ona görə də onlar daha fərqli yerləri görmək istəyir, fərqli mədəniyyətlə tanış olmağı arzulayır.
Avropanın ənənəvi turist ixrac edən ölkələrinin vətəndaşları xüsusilə istirahət və məzuniyyət günlərində turist kimi getdiyi ölkələri əsas etibarı ilə daimi saxlamağa çalışırlar. Dünyada belə bir təcrübə də var. Məsələn, elə otellər var ki, onlar 30 illik müştərilərinin olması ilə fəxr edirlər. Belə tendensiyanı təmin etmək üçün keyfiyyəti daim artırmaq lazımdır, arxayınlaşmaq olmaz. Hər il turist proqramlarında yeniliklər eləmək, turizmin inkişafı ilə bağlı çeşidliliyi artırmaq lazımdır. Bizdə yay və sağlamlıq turizmi, isti su şəbəkələri, Naftalan, kənd turizmi var.
Ekstrimal turizm imkanlarını artırmaq lazımdır. Xüsusilə bölgələrdə turizm məhsullarını artırmaq vacibdir. Turistlərin ölkəmizə təkrar olaraq gəlməsi üçün əyləncə vasitələrinin də sayını artırmalıyıq. Məsələn, müxtəlif festivallar, tanınmış müğənnilərin ənənəvi konsertləri təşkil oluna bilər. Bununla biz ənənəvi turizm bazarında yerimizi tutacağıq və beynəlxalq turizm bazarında Azərbaycan özünə layiq olan yeri tutacaq”.
Yeganə Bayramova
