Türkiyənin Burdur şəhərində Azərbaycan vətəndaşı Qənirə Cabbarova qətlə yetirilib.
"Ölkə.Az” xəbər verir ki, 24 yaşlı Qənirə mübahisə zəmnində sevgilisi 24 yaşlı Xəlil tərəfindən 55 bıçaq zərbəsi ilə öldürülüb.
Hadisə Burdurun Karamanlı rayonunda baş verib. Dünən bir barda əylənən Qənirə sevgilisi ilə Gölhisar rayonundakı evinə qayıtmaq üçün taksiyə minib. İddiaya görə, cütlük taksidə mübahisə edib və Tefenni-Çavdir yolunun Beyköy yol ayrıcında maşından enib. Mübahisə davaya çevrilib və Xəlil Cabbarovaya 55 bıçaq zərbəsi endirib.
Hadisəni görən taksi sürücüsü polisə xəbər verib. Əraziyə dərhal təcili yardım və jandarma cəlb edilib. Həkimlərin müdaxiləsinə baxmayaraq, Qənirəni xilas etmək mümkün olmayıb. Taksi sürücüsünün saxladığı Xəlil isə polis tərəfindən şöbəyə aparılıb.
