"Hər iki tərəf öz milli mənafeyini qorumağa çalışır. Ola bilər ki, ABŞ və Türkiyə arasında bəzi məsələlərdə fikir ayrılığı olsun, amma bu, beynəlxalq münasibətlərdə normaldır”.
Bu barədə "Sherg.az”a ABŞ Türkiyə arasındakı münasibətlərdən danışarkən politoloq Zərdüşt ƏIizadə bildirib. O qeyd edib ki, Türkiyə ilə Rusiyanın münasibətlərinin Qərbdə qıcıq yaratması real deyil:
"Bu dövlətlər hərəsi öz dövlət mənafeyi çərçivəsində başqa ölkələrlə əlaqələr qururlar. Türkiyəyə deyə bilməzlər ki, Rusiya ilə əməkdaşlıq etmə,ortaq işlər görmə. Türkiyə NATO-nun, Qərb dünyasının üzvüdür, iqtisadiyyatı Qərbə inteqrasiya olunub, bu ölkələrlə sıx əlaqəsi var.
Fikir müxtəlifliyinin yaranması adi haldır, amma ziddiyyətdən söhbət gedə bilməz. Hətta ən yaxın müttəfiqlər olan İngiltərə-Amerika, Almaniya- Fransa arasında da fikir ayrılıqları var. Bu, normaldır”.
Qeyd edək ki, Türkiyənin baş naziri Binəli Yıldırım ABŞ-a səfər edib. Noyabrın 7-dən 10-dək davam edəcək səfər çərçivəsində Binəli Yıldırım ABŞ-ın vitse-prezidenti Maykl Pens ilə görüşəcək. Görüşdə terrorizmə qarşı mübarizə, qarşılıqlı siyasi, iqtisadi, hərbi əlaqələr, miqrant böhranı, iki ölkə arasındakı viza probleminin həll edilməsi məsələləri müzakirə olunacaq.
Ayyət Əhməd
