Beynəlxalq təşkilatlarda Ukraynanın müdafiəsi işi ciddi və sistemli şəkildə aparılacaq
Ukrayna hərbi birləşmələri Rusiya ilə müharibə ehtimalına qarşı ölkənin müxtəlif bölgələrində səngər qazmağa başlayıb. Məlumata görə, qazıntı işləri daha çox Rusiya sərhədinə yaxın olan Şirokino bölgəsində aparılır. Qazılan səngərlərin iki ölkə arasında gərginliyin baş verdiyi Azov dənizindən 800 metr məsafədə yerləşdiyi bildirilir. Ekspertlərin fikrincə, son günlər Ukrayna mövqelərinə hücum edən Rusiya Kerç boğazında, eləcə də Qara dənizin müəyyən hissəsində hegemonluğu ələ almaq istəyir.
Tərəflər arasındakı gərginliyi dəyərləndirən politoloq Qabil Hüseynli deyib ki, Moskva indiyə qədər Ukraynaya qarşı hibrid müharibəsi aparırdısa, indi birbaşa müharibə variantını işə salıb: "Rusiya Ukrayna gəmilərinə hücum etməklə və onları girov götürməklə Azov dənizinə tam hakim olduğunu sübut etmək istəyir. Bölgədə çox qarışıq vəziyyət əmələ gəlib. Böyük ehtimalla, Rusiyanın Ukraynadakı səfirliyi qarşısında etirazlar böyüyəcək.
Qərb ölkələri Rusiyanın Ukrayna donanmasına qarşı təxribatını qətiyyətlə pisləyərək siyasi rəhbərlikdən və beynəlxalq təşkilatlardan Rusiyaya qarşı ciddi tədbirlərin görülməsini tələb edirlər. ABŞ başda olmaqla, Qərb dünyası Rusiyanın Ukrayna Hərbi Dəniz Qüvvələrinə məxsus gəmilərə hücumuna ciddi reaksiya verirlər. Gərginlik səngiməzsə, Rusiyaya qarşı sanksiyaların yeni, öldürücü mərhələsi sürətlənəcək. Lakin proses təkcə sanksiyalarla məhdudlaşmayacaq. Rusiyanın Ukraynaya qarşı apardığı pozucu təxribat işlərinin siyasi qiyməti də veriləcək.
Beləliklə, Ukraynanın öz torpaqlarının azadlığı uğrundakı mübarizəsinin ən azından siyasi cəhətdən əsaslandırılmış mərhələsi başlayacaq”.
Analitik vurğulayıb ki, hadisələrin bu istiqamətdə inkişaf etməsi Ukraynaya əlavə siyasi dividendlər gətirəcək:
"Qərb Ukraynaya öldürücü hücum silahlarını verə bilər. Həmçinin, Ukrayna ordusunun yenidən qurulması işi daha da sürətlənəcək. Ən başlıcası isə beynəlxalq təşkilatlarda Ukraynanın müdafiəsi işi ciddi və sistemli şəkildə aparılacaq. Yəni Azov dənizində baş verən arzuolunmaz hadisə Ukrayna məsələsini uzun müddət gündəmdə saxlayacaq”.
İsmayıl
