"Azərbaycan və ABŞ kütləvi qırğın silahlarının qarşısını almaq üçün birgə əməkdaşlıq edir. Bu əməkdaşlığın gözəl tarixi var”. Bunu ABŞ-ın ölkəmizdəki səfiri Robert Sekuta bildirib. Diplomat bildirib ki, kütləvi qırğın silahlarının qarşısının alınması üçün Amerika Azərbaycana ümumilikdə 26 milyon dollar ayırıb: "Ölkələrimizin bir çox məsələlərdə mövqeyi üst-üstə düşür.
Biz Azərbaycanın necə çətin bir bölgədə yerləşdiyini başa düşürük. Digər ölkələrin də Azərbaycan kimi kütləvi qırğın silahlarının qarşısının alınması istiqamətində addımlar atması məqsədəuyğundur”.
Məsələ ilə bağlı "Şərq”ə danışan Qərb Universitetinin professoru, politoloq Fikrət Sadıqov deyib ki, bu sahədə Azərbaycan-ABŞ arasında əməkdaşlıq uzun müddətdir davam edir. Ekspertin sözlərinə görə, Azərbaycan hər zaman beynəlxalq tribunalarda kütləvi qırğın silahlarına qarşı çıxış edib:
"Ölkəmiz ikitərəfli və çoxtərəfli formatlarda, müxtəlif sazişlər çərçivəsində dünyanın sivil dövləti kimi təhlükəli silahların tətbiqini pisləyib. Hətta bu məsələyə görə dəfələrlə dünya birliyini suçlayıb. Əfsuslar olsun ki, Qərb dövlətləri bizim mövqeyimizə seyirçi olublar və həqiqəti deməkdən qaçıblar. Buna baxmayaraq, Azərbaycan sülhsevər dövlət kimi mühüm beynəlxalq tədbirlərdə və kütləvi qırğın silahlarına qarşı aparılan bütün kampaniyalarda daim ön planda durub. İndiyə qədər bir çox konvensiyalara qoşulmuşuq, riskli silahlara qarşı sazişlərə düşünmədən imza atmışıq”.
Analitik bildirib ki, bütün bu addımlara görə ABŞ və digər Qərb dövlətləri Azərbaycanın mövqeyini və səylərini layiqincə qiymətləndirməlidir:
"Azərbaycanın kütləvi qırğın silahları yoxdur. Eyni zamanda, düşmən ölkə Ermənistan kimi təhlükəli atom elektrik stansiyasına da sahib deyilik. Heç bir dövlətin sülhü təhdid edən təhlükəli təşəbbüsünə dəstək verməmişik və bundan sonra da verməyəcəyik. Təəssüflər olsun ki, beynəlxalq aləm Ermənistandakı köhnəlmiş Metsamor AES-nə, daha doğrusu stansiyanın törədə biləcəyi təhlükəyə biganə yanaşır. Anlamırlar ki, orada baş verən kiçik qəza, bölgə üçün çox böyük fəlakət deməkdir”.
İsmayıl
