22 yaşlı qız özünü yaşadığı binanın 7-ci mərtəbəsindən atıb. İntihara səbəb olaraq gənc qızın işlədiyi "R- studio” gözəllik salonunun müdirəsi Rühiyyə Həsənovaya 850 manat borcu olduğu bildirilir.
Firuzə Dadaşovanın ailəsi də qızlarının intiharına salon müdirəsini ittiham edir. Məlumata görə, R.Həsənova borca görə, gənc qızı hədələyərək onu polisə verəcəyi ilə qorxudurmuş.
Məsələyə münasibət bildirən psixoloq Fərqanə Mehmanqızı "Sherg.az”a bildirib ki, bütün intiharlar psixoloji təzyiqlərin nəticəsində baş verir. Onun sözlərinə görə, psixoloji durumu zəif olan şəxslər təzyiqlərin qarşısında dayana bilmirlər:
"Nəticədə çıxış yolunu canlarına qəsd etməkdə görürlər. Yəqin ki, intihar edən xanım çoxdan bu barədə düşünürmüş. Ümumiyyətlə, psixoloji durumu yerində olmayan insanlar bir neçə dəfə intihar haqqında düşünürlər. İntihar etmək istəyənlərin davranışları da fərqli olur. Sadəcə olaraq biz ətrafımızdakı insanlara qarşı o qədər soyuqqanlı yanaşmağa başlamışıq ki, onların hansı durumda olduğunu görmürük”.
Psixoloq xüsusilə valideynlərin övladlarına qarşı diqqət göstərmələrinin vacib olduğunu vurğulayıb:
"Bəzən valideynlər uşaqlarında olan mənfi əlamətləri görmürlər. Bəlkə də onlar övladlarına mənfi məqamları yaraşdırmırlar. Ona görə də belə neqtaiv hallarda valideyn məsuliyyətsizliyi özünü göstərir. Yəqin ki, ailədaxili konfliktlər də olub.
Əgər intihar edən xanım kənardakı təzyiqləri ailəsinə bildirsəydi, belə bir nəticə olmazdı.
İntiharların çox olması ailədaxili-psixoloji şiddətlərin çoxluğundan xəbər verir. Bütün bunlar uşaqlarda özgüvənsizlik və intihar cəhdi yaradır. Valideynlərlə övladlar arasındakı bağ pozulub. Bu bağın pozulması da uşağın həyata bağlılığını əngəlləyir. Çünki valideynlər bizim gücümüz və cəsarətimizdir. Ona görə də xüsusilə valideynlərin bu məsələdə diqqətli olması vacibdir”.
Yeganə Bayramova
