Ölkəmizdə şəxsiyyət vəsiqələrinə dəyişikliklər edilməsi nəzərdə tutulur. Yeni şəxsiyyət vəsiqələrinə sürücülük vəsiqəsi məlumatlarının inteqrasiya olunması məsələsi nəzərdən keçirilə bilər.
Sürücülük vəsiqələrindəki məlumatların şəxsiyyət vəsiqələrinin çiplərinə daxil edilməsi texniki olaraq mümkündür. Şəxsiyyət vəsiqəsinə daxil edilən məlumatlar isə çiplərin yaddaş həcmindən asılı olacaq.
Xatırladaq ki, əvvəllər şəxsiyyət vəsiqələrinə elektron sağlamlıq kartları məlumatlarının inteqrasiya olunması imkanı nəzərdən keçirilirdi.
Yeni strukturda hazırlanması nəzərdə tutulan şəxsiyyət vəsiqələrinin daşınan arxiv funksiyasını yerinə yetirəcəyini deyən miqrasiya məsələləri üzrə ekspert Azər Allahverənov prosesin əlverişli olacağını bildirib.
Ekspert şəxsiyyət vəsiqələrinə ediləcək inteqrasiyanın səbəbi kimi, insanların üzərində əlavə sənəd daşımaq məsuliyyətindən azad olunacaqlarını düşünür:
"Dünyanın inkişaf etmiş ölkələrində məhz bu cür sənədlərin inteqrasiyası var. Daha çox müasir informasiya-kommunikasiya texnologiyalarının imkanlarından istifadə edilərək təkmil şəkildə tətbiq olunur. Təkmil şəkildə dedikdə isə burda minimum sənədlərin daşınması və ya daşınan sənədlərdə maksimum informasiya olması başa düşülür. Dünyada belə bir tendensiya gedir ki, bəzi ölkələrdə şəxsiyyət vəsiqəsi həm də xarici pasport funksiyasını yerinə yetirir. İnsanlar şəxsiyyət vəsiqəsi ilə xaricə səfər etmək imkanına malik olurlar. İndi yeni şəxsiyyət vəsiqələri xüsusi çiplərdə təsis olunur və həmin çiplərdə bir çox informasiyaları yerləşdirmək mümkündür. Nəinki həmin şəxsin bilavasitə özü ilə bağlı olan məlumatlar, həmçinin istifadə etdiyi sürücülük vəsiqəsi barədə informasiya əks oluna bilər.
Digər tərəfdən də elektron hökumət portalı fəaliyyət göstərir. Bir çox informasiyalar elektron şəkildə yerləşdirilir. Şəxsiyyət və sürücülük vəsiqəsi arasında inteqrasiya prosesi əslində texniki cəhətdən asan prosesdir. Ola bilsin ki, gələcəkdə başqa informasiyaların şəxsiyyət vəsiqəsində yerləşdirilməsinin şahidi olduq. Məsələn, şəxsiyyət vəsiqəsində şəxsin ailə durumu qeyd olunur. Həmin vəsiqədə eyni zamanda kim ilə evli olduğu, nikahın bağlanma tarixi və uşaqları qeyd edilə bilər. Tutaq ki, şəxs hansısa proseslərdə iştirak edirsə, artıq ondan əlavə sənəd tələb olunmur. Bunun üçün də, məsələyə məhz bu aspektdən yanaşıldığını düşünürəm”.
Qeyd edək ki, yeni nəsil şəxsiyyət vəsiqələrinin verilməsi, 2018-ci il yanvarın 1-dən başlanacağı planlaşdırılır.
Yeganə Bayramova
