Bakı Ağır Cinayətlər Məhkəməsində Binəqədi rayonunun yaşayış binasında baş vermiş yanğınla bağlı növbəti iclas keçirilib. Prosesdə vəsatətlərlə çıxış edən vəkil İlhamə Həsənova istintaqın düzgün aparılmadığını iddia edib. O bildirib ki, binanın üzlənməsi barədə sifariş Binəqədi Rayon İcra Hakimiyyəti tərəfindən verilib:
"Yanan binanın üzləndiyi materialdan bütün dünyada istifadə olunur. Onu bizim müdafiə etdiyimiz şəxslər kəşf etməyib. Həmin üzlüklər çətin yanan materialdır. Qazaxıstanda da ekspertiza keçirmişik və bunun şahidi olmuşuq. Amma Binəqədidəki bina 27 saniyə içərisində yanıb. Görünür, kimsə müdaxilə edib. Bu məsələ dəqiq araşdırılmalıdır”. Təqsirləndirilən şəxs də çıxış edərək bildirib ki, öz yaşadığı evi, ofisini həmin materialla üzləyib. Vəkilin iddiasını "Şərq”ə şərh edən İctimai Tədqiqatlar Mərkəzinin rəhbəri, kriminalist-tədqiqatçı İlqar Altayın sözlərinə görə, hadisənin nə zaman, necə baş verdiyini yüzlərlə insan görüb və yanğın başladığı andan etibarən videolentə alınıb: "Binanın yanmasına səbəb olan materialların, faktların hamısı istintaqın əlindədir. Belə bir məqamda istintaqın məsələni araşdırması və həqiqəti ortaya çıxarması çətin məsələ deyil. Əgər yanğın gecə baş versəydi, o zaman çətinlik və qeyri-dəqiqlik olardı. Məsələn, heç kimin görmədiyi və gecə vaxtı baş verən bir qətlin üstü çox gec açılır. Çünki cinayətin araşdırılması uzun vaxt tələb edir. Amma Binəqədidəki bina gündüz vaxtı alışıb
və yanğına nəyin səbəb olduğu bəlli olub. Anlayırıq ki, vəkilin işi təqsirləndirilən şəxsi müdafiə etməkdir. Müdafiə zamanı vəkil saman çöpündən də yapışaraq ittiham olunanı təmizə çıxartmağa çalışır. Lakin işə məntiqlə yanaşmaq lazımdır”. Ekspertin sözlərinə görə, "kimsə təxribat törədib, bilərəkdən üzlüyə od vurub” iddiası ilə hardasa razılaşmamaq olar. Lakin məsələ burasındadır ki, o boyda binanın bir neçə dəqiqəyə yanıb kül olmasına tez alışan üzlüklər səbəb olub: "Təxribatçı binanın hər yerinə benzin töküb yandırmayıb ki?! Neftdən hazırlanmış və yanmağa meyilli olan materialları binaya vuran şəxslər təxribatçıya şərait yaradıb. Bir kriminalist kimi vəkilin iddiası ilə razılaşmıram. Yanğınsöndürənlər hadisə yerinə vaxtında gəliblər. Sadəcə bina sürətlə alışdığına görə qarşısını almaq mümkün olmayıb. Son olaraq deyim ki, yaşayış binalarına bu cür sintetik üzlüklərin vurulması elə əvvəlcədən düşünülmüş cinayətdir”.
İsmayıl
