"Qiymətə təsir edən qüvvələr onlardır. Hətta yarmarkalara çıxarılan məhsul marketlərdəki məhsullardan bahadır"
"Paytaxt Bakıda təşkil olunan yarmarkalarda istehsalçılar öz məhsulunu birbaşa istehlakçıya təqdim edə bilmir”
Bu sözləri "Sherg.az”a iqtisadçı-ekspert Fuad İbrahimov deyib.
Onun qənaətincə, yarmarkaların yaradılması üçün bəzi şərtlər mövcuddur:
"Əmtəə bazarında yarmarkaların təşkili ilə bağlı konkret leksiyalar deyilir. Bu, elmi cəhətdən işıqlandırılmış bir işdir. Bazar münasibətləri şəraitində yaşayırıqsa, yarmarkaların keçirilməsi vacibdir. Yarmarkalar olmalıdır. Buna hər cür şərait yaradılmalıdır. Bu məqsədlə də yarmarkaların təşkilinin qarşısında bir sıra məqamlar qoyulur. Yarmarkalar təyinatlı olmalıdır. Azərbaycanda yarmarkaların təşkilinin məqsədi o olmalıdır ki, bazarda kefiyyətli məhsul çatışmazlığı aradan qalxsın. Və ayrı-ayrı iri market şəbəkələri ilə nisbətdə qiymət fərqi əmələ gəlsin. Yəni pərakəndə satış obyektlərinin, iri marketlərin, topdansatış mərkəzlərinin qiyməti ilə yarmarkaların qiyməti fərqlənməlidir. Burada da məqsədi odur ki, istehsalçı yarmarkada öz məhsulunu birbaşa istehlakçıya təklif etsin. Fermer istehlakçı ilə əlaqəyə girə bilməlidir".
Xaricdə və ölkəmizdə təşkil olunan yarmarkaların müqayisəsini aparan ekspert onu da qeyd edib ki, Avropada belə yarmarkalar həftədə bir dəfə keçirilir:"Bu zaman da kənd təsərüfatı məhsullarının istehsalçıları ilə istehlakçıları birbaşa əlaqəyə girir. Fermerlər öz məhsullarının satışını həyata keçirirlər. Beləliklə də yarmarkalarda qiymət fərqi nəzərə çarpır. Bizdə bu məsələ çox fərqlidir. Ona görə ki, birincisi bizdə kəndli, fermer, istehsalçı yarmarkalara birbaşa çıxa bilmir. Yarmarkalara çıxan adamlar onların heç təmsilçiləri də deyil. Sadəcə bu vəziyyətdən istifadə edib ortalıqda pul qazanan iştirakçılardır. Qiymətə təsir edən qüvvələr onlardır. Hətta yarmarkalara çıxarılan məhsul marketlərdəki məhsullardan bahadır. Bəzi iri marketlərmizdə məhsulları yarmarkalara nisbətən 10 faiz ucuz qiymətə əldə etmək olur”.
Qoz ləpəsinin qiymətindəki artıma gəlincə, F.İbrahimli diqqətə çatdırıb ki, bu qanımıza işləmiş bir məqamdır:
"Bilirsiniz ki, Novruz bayramının gəlməsi ilə əlaqədar qoz ləpəsi və digər çərəzlərə təlabat artır. Bu məqsədlə də həmişəki kimi qiyməti süni şəkildə bahalaşdırırlar. Vətəndaşlar da belə süni qiymət artımı ilə üzləşirlər”.
Kənan Eynuroğlu
