"Taxoqraf sayğac kimi ölçü cihazıdır. Bu cihazlar xaricdən alınır. İstifadə zamanı onlar mütləq yoxlanılmalı və sınaqdan keçirilməlidir"
Taxoqraf cihazı ilə təmin olunmayan və taxoqrafla bağlı qaydaları kobud şəkildə pozan daşıyıcılar və sürücülər məsuliyyətə cəlb ediləcək.
Nəqliyyat, Rabitə və Yüksək Texnologiyalar Nazirliyi yanında Dövlət Avtomobil Nəqliyyatı Xidmətinin mətbuat xidmətinin rəhbəri Nuridə Allahyarovanın sözlərinə görə, Nazirlər Kabinetinin müvafiq qərarına əsasən beynəlxalq və ölkədaxili (şəhərlərarası və rayonlararası) sərnişin daşımalarını həyata keçirən ümumi istifadədə olan avtonəqliyyat vasitələri taxoqrafla təchiz edilməlidir:
"Beynəlxalq yük daşımalarını, həmçinin ölkədaxili, şəhərlərarası və rayonlararası yük daşımalarını təşkil edən daşıyıcılar və yerinə yetirən sürücülər müvafiq daşımaların taxoqraf olmadan, habelə taxoqrafın yoxlanması haqqında şəhadətnamə və ya müvafiq möhür olmadan, yaxud yoxlanma müddəti bitmiş və ya plomblanması pozulmuş, tamamilə və ya hər hansı funksiyası işləməyən taxoqrafla, taxoqrafın qeydiyyata aldığı məlumatlar saxtalaşdırılmaqla yerinə yetirilməsinə görə məsuliyyət daşıyacaqlar”.
Qeyd edək ki, elektron cihaz olan taxoqrafın iş prinsipi belədir ki, sürücü xüsusi kartı aparata daxil edir. Bundan sonra işə düşən taxoqraf sürücünün neçə saat işləməsi haqqında məlumatları özündə saxlayır. Yəni nəqliyyat vasitəsi hərəkətdə olanda həmin müddət iş saatı kimi cihazın yaddaşına yazılır. Bu məlumatlar həm də mərkəzi informasiya bazasında əks olunaraq toplanacaq.
Ekspert Ərşad HüseynovEkspert Ərşad Hüseynov isə hesab edir ki, dəyişikliyi tətbiq etmək çətin olacaq:
"2014-cü ildə verilən qərarla ölkədaxili yükdaşımalarda, şəhərlərarası marşrutlarda taxoqrafların istifadəsi məcburi oldu. Amma bu sahədə hələlik nizamlı iş aparılmır. İndi İctimai Xətalar Məcəlləsindəki 342-ci maddəyə bəzi dəyişikliklər gözlənilir.
Amma təəssüflər olsun ki, bu iş özlüyündə normal təşkil olunmayıb. Taxoqraf elə bir cihazdır ki, onu hər kəs alıb avtomobilinə yerləşdirə bilməz. Bunu xüsusi akkreditasiyası olan müəssisələr etməlidir. Taxoqraf sayğac kimi ölçü cihazıdır. Bu cihazlar xaricdən alınır. İstifadə zamanı onlar mütləq yoxlanılmalı və sınaqdan keçirilməlidir. Bu işlər qaydasında olmadığından, məsuliyyət müəyyən edilsə də, onu tətbiq etmək bir qədər çətin olacaq”.
Ə.Hüseynovun sözlərinə görə, taxoqraf sürücünün avtomobillə gün ərzində neçə km məsafə qət etdiyini göstərir. Yük avtomobillərində və avtobuslarda rəqəmsal taxoqrafların quraşdırılmasında da məqsəd sürücülərin nə qədər işlədiyinə və istirahət rejiminə nəzarəti təmin etməkdir.
Hədəf odur ki, sürücülər yorğun olmasınlar, sükan arxasında yuxulamasınlar, normal istirahət edə bilsinlər, aqressivləşməsinlər, yola və avtomobilə tam nəzarət edə bilsinlər. Ona görə də gələcəkdə yoxlamalar zamanı problemlərlə üzləşməmək üçün avtobus və yük avtomobili sahiblərinə indidən hazırlaşmaq məsləhətdir.
Şəymən
