Abşeron Rayon Mərkəzi Xəstəxanasının təşəbbüsü və Abşeron Rayon Səhiyyə İşçiləri Həmkarlar İttifaqı Şurasının dəstəyi ilə 8 Mart – Beynəlxalq Qadınlar Günü münasibətilə xəstəxanada çalışan şəhid, qazi və veteran ailələrinin qadın üzvləri ilə görüş təşkil edilib.
Sherg.az xəbər verir ki, tədbirdə çıxış edən Abşeron Rayon Mərkəzi Xəstəxanasının baş həkimi Səkinə Sadıxova Vətənin ərazi bütövlüyü uğrunda canından keçən şəhidlərə rəhmət diləyib, qazilərə və müharibə veteranlarına sağlamlıq və uzun ömür arzulayıb. O, eyni zamanda, bütün Azərbaycan qadınlarını Beynəlxalq Qadınlar Günü münasibətilə səmimi-qəlbdən təbrik edib, onlara xoşbəxtlik və firavan həyat arzulayıb.
Tədbirdə çıxış edən Elvin Məmmədzadə xanımları bayram münasibətilə təbrik edərək, onların ailə və cəmiyyət üçün əvəzsiz dəyərə malik olduğunu vurğulayıb.
Şəhid ailəsi nümayəndəsi Xatirə İsmayılova çıxışında Abşeron Rayon İcra Hakimiyyətinin başçısı Abdin Fərzəliyevin və Səkinə Sadıxovanın şəhid ailələrinə və qazilərə göstərdiyi xüsusi diqqəti və qayğını yüksək qiymətləndirib. O, 8 Mart münasibətilə təşkil edilən bu tədbirin həmin qayğının bariz nümunəsi olduğunu vurğulayaraq təşəkkürünü bildirib.
Görüşün sonunda iştirakçılara hədiyyələr təqdim olunub və xatirə şəkilləri çəkilib.
Məlumat üçün:
Abşeron Rayon Mərkəzi Xəstəxanası mütəmadi olaraq şəhid və qazi ailələri üçün sosial dəstək tədbirləri həyata keçirir. Bu görüş də həmin təşəbbüslərin davamıdır və şəhid ailələrinə, qazilərə xüsusi diqqət və qayğının bir ifadəsidir.
