Fövqəladə Hallar Nazirliyinin "112" qaynar xəttinə Ağdam rayonunun Sarıçoban kəndində yanğın baş verməsi barədə məlumat daxil olub.
Bu barədə Teleqraf-a qurumun Mətbuat xidmətindən bildirilib.
Məlumatla əlaqədar dərhal FHN-in Dövlət Yanğından Mühafizə Xidmətinin Ağdam rayon Yanğından Mühafizə Hissəsinin qüvvələri əraziyə cəlb olunub.
Yanğınsöndürənlərin çevik müdaxiləsi sayəsində vətəndaşa məxsus fərdi yaşayış evinə bitişik yardımçı tikilidə baş vermiş yanğın genişlənməsinə, o cümlədən bitişik evə keçməsinə imkan verilmədən qısa müddətdə söndürülüb.
Yanğın nəticəsində ümumi sahəsi 18kv.m. olan yardımçı tikilinin yanar konstruksiyaları yanıb və içərisində olan ev quşları tələf olub.
Bitişik ev yanğından mühafizə olunub.
Təhlükəsizlik məsələləri üzrə ekspert Elmar Nurəliyev "Sherg.az"a açıqlamasında bildirib ki, bütün təyinatlı obyektlər yanğın təhlükəsizliyi qaydalarına ciddi əməl etməlidir:
“Obyektlərdə yanğın təhlükəsinə dair olan həm təchizatın saz vəziyyətdə saxlanmasını, həm də yanğın təhlükəsizliyi normativ standartlarına ciddi riayət edilməsini təmin etməlidir. Bu, qanunvericiliklə təsbit olunub. Ümumiyyətlə, yay aylarında elektrik enerjisinə, soyutma sistemlərinə kondisionerə tələbat artdığına görə elektrik xətlərində normadan artıq yüklənmə, qızma, qısaqapanma, alışma yanğına gətirib çıxardır. Ona görə mütləq elektrik təsərrüfatı saz vəziyyətdə olmalıdır. Elektrik naqillərinin izolyasiyası pozulması, kənar müdaxilənin edilməsi yolverilməzdir. Yəni daim saz vəziyyətdə saxlamaq lazımdır ki, qısa qapanma və normadan artıq yüklənmə olmasın. Biz yanğınların baş vermə statistikasına baxanda da görürük ki, böyük əksəriyyəti elektrik təsərrüfatının payına düşüb. Açıq sahələrdə, meşə ərazilərində oddan istifadə etməmək lazımdır”.
