Xocalıda erməni quldurlarının dinc azərbaycanlılara qarşı törətdiyi soyqırımının əsas təşkilatçılarından və icraçılarından biri, separatçı-terrorçu Seyran Ohanyanın deputat toxunulmazlığının ləğv edilməsi onun təkcə Ermənistanda deyil, Azərbaycanda da mühakiməsinin yolunu aça bilər.
Teleqraf xəbər verir ki, 1990-cı illərin əvvəllərində Azərbaycan torpaqlarının işğalında fəal iştirak etmiş S.Ohanyan indi Ermənistanda torpaq zəbtində təqsirləndirilir.
O, müdafiə naziri işlədiyi 2010-2015-ci illərdə Geqarkunik rayonunun Draxtik icmasında 10,5 min kvadratmetr ərazini qanunsuz olaraq mənimsəməkdə ittiham olunur.
Qeyd edək ki, 63 yaşlı S.Ohanyan Şuşada doğulub. Təhsilini Bakı Ali Ümumqoşun Komandirlər Məktəbində alıb.
O, 2000-2007-ci illərdə Qarabağdakı keçmiş qondarma rejimin, 2008-2016-cı illərdə Ermənistanın müdafiə naziri olub. Birinci və İkinci Qarabağ müharibəsində iştirak edən S.Ohanyan Xocalı soyqırımını törədənlərdən biridir. 44 günlük müharibədə isə o, qondarma rejimin “prezident”inin hərbi məsləhətçisi kimi Şuşanın müdafiəsinə rəhbərlik etmişdi.
2020-ci ildə Azərbaycan hüquq-mühafizə orqanları onun barəsində Cinayət Məcəlləsinin 103-cü (soyqırımı) və başqa maddələri ilə cinayət işi başlayıb, beynəlxalq axtarışa verib.
Bakı Hərbi Məhkəməsində S.Ohanyan barəsində qiyabi həbs-qətimkan tədbiri seçilib.
Ermənistanın Azərbaycana qarşı hərbi təcavüzü nəticəsində sülh və insanlıq əleyhinə cinayətlər, müharibə cinayətləri, o cümlədən təcavüzkar müharibənin hazırlanması və aparılması, soyqırımı, müharibə qanunlarını və qaydalarını pozma, habelə terrorçuluq, terrorçuluğu maliyyələşdirmə, hakimiyyəti zorla ələ keçirmə, onu zorla saxlama və digər çoxsaylı cinayətlər törətməkdə təqsirləndirilən Ermənistan vətəndaşlarının Bakıda davam edən məhkəmə prosesində zərərçəkmişlərin, şahidlərin və təqsirləndirilən şəxslərin ifadələri ilə S.Ohanyanın Qarabağda həyata keçirilmiş soyqırımı və digər cinayətlərdə iştirakı təsdiqlənir.
Rəsmi ittihamda deyilir ki, S.Ohanyan Ermənistan dövlətinin, onun dövlət qurumlarının vəzifəli şəxslərinin, hərbi qüvvələrinin və qanunsuz silahlı birləşmələrin bilavasitə rəhbərliyi və iştirakı, şifahi-yazılı qaydada verdiyi tapşırıq, göstəriş və təlimatları, maddi, texniki, şəxsi heyətlə verdiyi dəstəyi, mərkəzi qaydada idarəçiliyi əsasında, eləcə də ciddi nəzarəti altında Azərbaycan ərazisində daxili və beynəlxalq hüquq normalarına zidd şəkildə, Azərbaycana hərbi təcavüz etmək məqsədilə yaradılmış cinayətkar birliyin rəhbərindən biri, bilavasitə və dolayı iştirakçısı olub.
Belə olan halda Azərbaycan hüquq-mühafizə orqanları S.Ohanyanın Azərbaycana təhvil verilməsini və ölkəmizdə mühakimə olunmasını Ermənistan hökumətindən tələb edə bilər.
