Bu gün bir sıra rayonlarda icra hakimiyyətlərindən narazılıqlar var
Prezident İlham Əliyev Nərimanov, Nizami, Kürdəmir rayonlarına yeni icra hakimiyyəti başçıları təyin edərkən dövlət məmurlarına bir daha ciddi xəbərdarlıq etdi. Dövlət başçısı hamının qanun qarşısında bərabər olduğunu bildirdi. Məmurları qanunazidd əməllərdən uzaq olmağa, vətəndaşlara diqqət və qayğı ilə yanaşmağa çağırdı. Prezident dəfələrlə yeni vəzifə təyinatları zamanı dövlət məmurlarına ciddi xəbərdarlıqlar edib. Ancaq təəssüf olsun ki, bəzi məmurlar bu xəbərdarlıqlardan nəticə çıxarmırlar və əvvəlki əməllərinə davam edirlər.
Millət vəkili Ceyhun Məmmədov “Şərq”ə deyib ki, bu gün bir sıra rayonlarda icra hakimiyyətlərindən narazılıqlar var. Deputatın sözlərinə görə, hələ də bəzi icra başçıları vətəndaşlarla münasibəti düzgün qurmur, kabinetdən çıxmır, özlərini “kiçik padşah” kimi aparırlar:
“Bu da cəmiyyətdə haqlı olaraq narazılıq yaradır. Bütün icra hakimiyyəti başçıları öz vəzifələrini məsuliyyət və vicdanla yerinə yetirsələr, zaman-zaman bir sıra icra hakimiyyətləri qarşısında vətəndaşlar özlərini yandırmaz və ya mitinq keçirməzdilər. Prezident İlham Əliyevin hər zaman qeyd etdiyi kimi, “vəzifə imtiyaz və ya üstünlük deyil, yüksək etimad və məsuliyyətdir”.
Yüksək etimad göstərilən hər bir dövlət məmuru məsuliyyətini dərk etməli, xalqın qulluqçusu olmalı, xəyanət etməməlidir. Vəzifəsindən irəli gələn öhdəlikləri vicdanla və ləyaqətlə yerinə yetirməli, vətəndaşlarla münasibəti düzgün qurmalıdır. Onlarla daimi əlaqədə olmalı, problemlərinə həssas, yüksək diqqət və qayğı ilə yanaşmalıdır”.
C.Məmmədov qeyd edib ki, Vətən müharibəsində şanlı qələbəmizdən sonra bölgədə yeni siyasi və iqtisadi reallıq yaranıb:
“Dövlətimiz yeni mərhələyə qədəm qoyub. Qarşıda bizi böyük quruculuq işləri gözləyir. Dövlətçiliyimizi, müstəqilliyimizi, qələbəmizi daha da gücləndirməliyik. Hazırda ölkəmizdə kadr islahatları sürətlə və uğurla həyata keçirilir. Son aylar bir çox sahələrə yeni gənc kadrlar təyin olunub. Kadr təyinatında bilik və bacarıqlara xüsusi önəm verilir. Bütün bu addımlar ölkəmizin inkişaf və tərəqqisinə öz ciddi töhfəsini verəcək”.
