Doğulduqdan 2 yaşa qədər uşaqların ən sürətli böyümə dövrüdür. Yaxşı olardı ki, bu vaxt ərzində körpələr ana südüylə qidalansın
Azərbaycanda körpələrini yalnız ana südü ilə qidalandıran analara çox az rast gəlinir. Artıq iş o yerə çatıb ki, uşağını pediatra aparan analar həkimin təyinatı üzrə müalicə ilə yanaşı, həm də körpələrinin qidasını da dəyişməli olurlar. Bu gün satışda müxtəlif növ və müxtəlif qiymətə uşaq qidaları mövcuddur. Ümumiyyətlə süni uşaq qidaları təhlükəlidirmi? Bu qidalar hansı xəstəlikləri yarada bilər?
Suallarımızı cavablandıran pediatr Qoşqar İsmayılov "Sherg.az"a söyləyib ki, heç bir qida ana südünü əvəz edə bilməz:
"Təəsüf ki, son zamanlar analarda südün müəyyən səbəbdən azalması nəticəsində məcbur süni uşaq qidaları təyin olunur. Lakin, səbəbsiz bu qidaları deyişmək məsləhət deyil. Tez-tez belə hallar yaranarsa, körpələrdə müxtəlif gastrointestinal problemlərə səbəb ola bilər. Əgər suni qidalara ehtiyac olarsa, mütləq həkiminiz ilə əlaqə saxlayın. Ümumiyyətlə, doğulduqdan 2 yaşa qədər uşaqların ən sürətli böyümə dövrüdür. Yaxşı olardı ki, bu vaxt ərzində körpələr ana südüylə qidalansın. Süni qidalar uşağın həm fiziki, həm də psixoloji halına təsir edir, xəstəliklərə qarşı müqaviməti zəiflədir. Həmçinin, süni uşaq qidalarının tərkibində şəkər çox olduğu üçüb bu nüans uşağın çəkisini artırır. Ümumiyyətlə, uşaq süni qidalarına maraq reklamlarla bağlıdır. Bir sözlə, ana ilə təzə doğulan körpənin arasındakı o mənəvi-psixoloji bağların yaranmasında, ananın müxtəlif onkoloji xəstəliklərdən qorunması üçün ana südü ilə qidalandırma çox mühümdür"
