Qafqaz Alimləri Elmi Cəmiyyətinin prezidenti, politoloq Aleksandr Krılov deyib ki, sülh sazişi yalnız hazırda yaranmış vəziyyəti rəsmiləşdirəcək:
"Lakin Ermənistan zəifləməkdə davam edir və Azərbaycan dinamikanın onların xeyrinə olduğuna əmindir. Belə şəraitdə yeni eskalasiya ssenarisi daha real görünür".
Mövzu ilə bağlı "Sherg.az"a danışan politoloq Əhəd Məmmədli hesab edir ki, hazırkı geosiyasi reallıqlar Azərbaycanın İkinci Qarabağ müharibəsindən sonra Ermənistan üzərində siyasi üstünlük əldə etdiyini və regiondakı güc balansında mühüm dəyişikliklər baş verdiyini göstərir:
"Güclü dövlətlər, öz nüfuzlarını və təsir imkanlarını nümayiş etdirmək üçün zəif ölkələrə qarşı üstünlüklərini göstərmək istəyirlər. Bu, beynəlxalq münasibətlərin mürəkkəbliyini və bəzən düzgün işləmədiyini ortaya qoyur. Beynəlxalq hüququn və institutların ziddiyyətli və qeyri-konstruktiv yanaşmaları, eyni zamanda, güc siyasətinin üstünlük təşkil etməsi nəticəsində yeni geosiyasi və diplomatik vəzifələr yaranır. Bu yeni şəraitdə, Azərbaycan həm regional, həm də qlobal səviyyədə öz gücünü doğru istiqamətdə istifadə etməli, bununla da mövcud situasiyanı öz xeyrinə çevirməlidir. Azərbaycanı dəstəkləyən beynəlxalq tərəfdaşlar, bu gücdən maksimum səmərə əldə etmək üçün onu doğru şəkildə tətbiq etməyin vacibliyini vurğulayırlar. Bu yanaşma, yalnız Azərbaycanın siyasi maraqlarına xidmət etməklə kifayətlənməyib, həm də regional stabilliyi və təhlükəsizliyi təmin etmək qayəsi daşıyır. Digər tərəfdən, Azərbaycanın əleyhdarları ölkənin artan gücünü balanslaşdırmaq və qarşısını almaq üçün müxtəlif xəbərdarlıqlar, təzyiqlər tətbiq edirlər. Onlar, Azərbaycanı diplomatik və iqtisadi cəhətdən təcrid etməyə, həmçinin beynəlxalq təşkilatlarda daha çox təzyiq göstərməyə çalışırlar".
Ekspert əlavə edib ki, Azərbaycan, hər iki tərəfin mövqeyini diqqətlə nəzərə alaraq, beynəlxalq əlaqələrdəki mövcud vəziyyəti öz strateji məqsədlərinə çatmaq üçün dərin təhlil etməli və bu məqsədlərə doğru irəliləməyə davam etməlidir:
"Azərbaycanın gücündən səmərəli və təsirli şəkildə istifadə etməsi, həm daxili siyasi stabilliyin təmin olunmasına, həm də beynəlxalq səviyyədə ölkənin nüfuzunun artmasına kömək edəcək. Çünki məqsədlərə çatmaq üçün mövcud vəziyyətdən, müttəfiqlərdən, beynəlxalq təşkilatlardan və ölkənin siyasi, iqtisadi, hərbi gücündən optimal şəkildə istifadə etmək olduqca önəmlidir. Bu, yalnız Azərbaycanın təhlükəsizliyini və iqtisadi inkişafını təmin etməyəcək, eyni zamanda regional və qlobal geosiyasi müstəvidə daha güclü bir mövqe tutmasına imkan verəcəkdir."
