“ATƏT-in Demokratik Təsisatlar və İnsan Hüquqları Bürosu (ATƏT/DTİHB) Gürcüstana göndəriləcək müşahidə missiyasını bir ay ərzində komplektləşdirə bilərdi. Əslində bu proses bir neçə gün tələb edir”.
Teleqraf-ın yerli bürosu xəbər verir ki, bunu Gürcüstanın Baş naziri İrakli Kobaxidze ATƏT/DTİHB Gürcüstana müşahidəçilər göndərməkdən imtina etməsini jurnalistlərə şərh edərkən söyləyib.
O, həddindən artıq bürokratiyanın Avropaya zərər yetirdiyini bildirib.
“Bir ay missiyanın formalaşdırılması üçün kifayət qədər yetərlidir. Lakin anlayıram ki, bütün bunlar ATƏT/DTİHB üçün ciddi sınaq ola bilərdi. Belə ki, qurum Gürcüstandakı parlament seçkiləri ilə bağlı rəyini açıqlayandan sonra hücumlara məruz qalmışdı. Ola bilsin ki, ATƏT/DTİHB bu cür baş ağrısını artıq istəməyib və biz təşkilatın mövqeyini başa düşürük”, - İ.Kobaxidze söyləyib.
Qeyd edək ki, Gürcüstan hökuməti sentyabrın 6-da ATƏT/DTİHB-ni oktyabrın 4-də keçiriləcək yerli seçkilərin müşahidəsinə dəvət edib. Üç gün sonra təsisat dəvəti gec aldığını əsas gətirərək Gürcüstana müşahidə missiyası göndərə bilməyəcyini açıqlayıb.
