İran əleyhinə həyata keçirilən zərbələrdə gözlənilməzlik amili İsrailə əhəmiyyətli uğurlar gətirib.
Teleqraf xəbər verir ki, bu barədə İsrailin Baş naziri Benyamin Netanyahu yayımladığı videomüraciətdə bildirib.
Lakin o, qarşı tərəfdən güclü və kütləvi əks-hücumların mümkünlüyü barədə xəbərdarlıq edib.
Baş nazir gələcəkdə gözlənilən təhlükələrə qarşı hazırlıqlı olmağa çağırış edib və vəziyyətin gərginliyini qoruduğunu vurğulayıb.
Xatırladaq ki, İsrail Hərbi Hava Qüvvələri iyunun 13-də səhər saatlarında İrana zərbələr endirib. Hücum zamanı ölkənin Fordo və Natantz nüvə obyektləri, eləcə də hərbi bazaları hədəfə alınıb. İranın Atom Enerjisi Təşkilatı Natanz nüvə müəssisəsinin məhv edildiyini təsdiqləyib.
Hava əməliyyatları nəticəsində İran İslam İnqilabı Keşikçiləri Korpusunun baş komandanı general-mayor Hüseyn Salami, Silahlı Qüvvələrin Baş Qərargah rəisi general-leytenant Məhəmməd Hüseyn Baqiri, Ali Rəhbərin müşaviri Əli Şamxani, “Hatəm-əl-Ənbiya” Qərargahının rəisi Qulam Əli Rəşid, İran İslam İnqilabı Keşikçiləri Korpusunun Aerokosmik Qüvvələrinin komandanı Əmirəli Hacızadə daxil olmaqla iyirmi yüksək rütbəli zabit və altı nüvə fizikası mütəxəssisi həlak olub. Ümumilikdə isə, onlarla şəxsin həlak olduğu, yüzlərlə şəxsin isə yaralandığı bildirilir.
İran Prezidenti Məsud Pezeşkian və ölkənin Ali Rəhbəri Əli Xamanei İranın İsrailə cavab zərbəsi endirəcəyini bəyan edib.
