“Bir sıra ölkələrdə bir neçə hədəfi vurmalı olacağıq”
Rusiya prezidenti Vladimir Putin Ukraynanı işğal edəndən bəri səslənən sual budur: Kreml bu müharibədə nüvə silahından istifadə edə bilərmi?
"Sherg.az" Türkiyə mediasına istinadən xəbər verir ki, ABŞ prezidenti Co Bayden bu variantı istisna etmir. Bayden Putinin taktiki nüvə silahından istifadə etməsindən narahat olduğunu deyib. Onun sözlərinə görə, real təhlükə var.
Rusiyalı xarici və müdafiə siyasət üzrə ekspert Sergey Karaqanovun məqaləsində bu məsələ yer alıb. Kremlə yaxınlığı ilə tanınan Karaqanov iddia edib ki, Rusiya Qərbin iradəsini qırmaq üçün nüvə silahından istifadəni yenidən inandırıcı arqumentə çevirməlidir: "Düşmən bilməlidir ki, biz qisas almaq üçün qabaqlayıcı zərbə endirməyə hazırıq. Onlar geri çəkilməsələr necə olacaq? O zaman bir sıra ölkələrdə bir neçə hədəfi vurmalı olacağıq ki, ağlını itirənlər özlərini geri çəkə bilsinlər".
Putin artıq Rusiyanın Belarusda bir sıra taktiki nüvə silahlarını yerləşdirdiyini təsdiqləyib. S.Karaqanovun sözlərinə görə, bu addım Moskvanın “strateji məğlubiyyət”inə ümid edənləri yenidən düşünməyə vadar etmək üçün atılıb.
Təbii ki, Rusiyada hamı bu ideyanı dəstəkləmir. “Kommersant” qəzetində dərc olunan məqalədə bildirilib ki, "Nüvə müharibəsi problemlərimizi həll etmək üçün çox pis üsuldur”. Məqalədə diqqət çəkən məqam odur ki, Ukraynaya qarşı nüvə silahından istifadə edib-etməmək Rusiyada ictimai müzakirəyə çevrilib.
Beynəlxalq Təhlükəsizlik Mərkəzinin ekspertləri bildiriblər ki, nüvə silahlarının adi hərbi üsulların həll edə bilmədiyi strateji problemləri həll edə biləcəyini düşünmək son dərəcə şübhəlidir və böyük bir yanlışlıqdır: "Müasir tarix hərbi əməliyyatların gözlənilməz nəticələr verdiyi çoxsaylı nümunələrlə doludur. Sözsüz ki, nüvə hücumu münaqişəni yeni səviyyəyə çıxaracaq və riskləri dəfələrlə artıracaq. Nüvə ruletinin radioaktiv qalıqlarının parlaq bir zəmin yaratmaq ehtimalı yüksəkdir. Sensasiyalı ideyaların və təhlükəli qumarların pərəstişkarları bunu yadda saxlasalar yaxşı olar”.
Vurğulanır ki, Rusiya media mühiti dövlətin nəzarətində olsa da, bəzi platformalarda, hətta indiki məhdudiyyətlər çərçivəsində kiçik müzakirə imkanları var. Xüsusilə nüvə müharibəsi kimi həssas mövzularda müzakirələri dondurmaq mümkün deyil. Bəlkə də müzakirələr Qərbin diqqətini cəlb etməyə, Putini "yaxşı polis", Karaqanovu isə "pis polis" kimi göstərməyə hesablanıb. Kreml rəhbəri şəxsən özü Qərbə qarşı qabaqlayıcı nüvə zərbəsinə çağırış etmir. Bu arqumentə görə, yaxşı olar ki, Qərb Putinlə sülh masasında oturub danışsın ki, Karaqanov kimi sərt xəttə önəm verən şəxslərin yanaşması qalib gəlməsin və nüvə düyməsi basılmasın. Amma bir şey aydındır: Rusiyada anti-Qərb ritorikası artdıqca və Ukrayna ordusunun əks-hücumları davam etdikcə, nüvə silahından istifadə məsələsi aktuallığını qoruyacaq".
