Türkiyədə itkin düşmüş belaruslu əkiz bacılar Valentina və Marya İvankovaların axtarışları davam edir.
“Sherg.az” “Milliyet.com.tr”yə istinadən xəbər verir ki, itkiş düşən əkiz bacılar alpinistdirlər. Onlar 5 gün əvvəl Aladağların Yedigöllər bölgəsinə gəzintiyə çıxıblar və 2 gündən sonra geri dönəcəklərini bildiriblər. Lakin 2 gün keçsə də, bacılar geri dönməyib və onlarla əlaqə saxlamaq da mümkün olmayıb. Bundan sonra əməliyyat-axtarış tədbirlərinə başlanılıb. AFAD və Jandarma Axtarış-Xilasetmə qrupu bölgəyə göndərilib. Ancaq axtarışlar hələ ki bir nəticə verməyib. Hava qaralınca yarımçıq qalan iş ertəsi gün səhərin ilk saatlarında yenidən başlayıb. Aladağların bir hissəsinin sərhədləri daxilində qaldığı Kayseridə bu bölgədəki işlərə AFAD, Jandarma Axtarış-Xilasetmə və Yəhyalının həvəskar alpinistlərindən ibarət qrup da qatılıb. Niğde Jandarma Axtarış-Xilasetmə və AFAD qrupları Sokullupınar marşrutu üzərində Kızılkaya zirvəsi və Emli vadisi bölgəsində işlərini davam etdirir. Ankaradan havaya qalxan pilotlu kəşfiyyat təyyarəsi də bölgədə səmadan çəkiliş aparır. Alpinist bacıların axtarışlarına Belarus konsulluğunun noyabrın 19-da Niğde bələdiyyəsinə məlumat verməsindən sonra başlanılıb. Niğde bələdiyyəsindən hadisə ilə bağlı verilən açıqlamada alpinist bacıların Kızılkaya zirvəsinə doğru hərəkət etdiklərini bildirib: “Belarus konsulluğu tərəfindən bələdiyyəmizə telefonla verilən məlumata görə, Marya və Valentina İvankova alpinizmlə məşğul olmaq üçün noyabrın 15-də Ankaradan Niğdeyə gəliblər. Ancaq noyabrın 18-də geri dönəcəkləri bildirilsə də, onlardan heç bir xəbər alınmayıb. Xilasetmə komandasından 4 nəfər və AFAD qruplarından 10 nəfər heyətlə axtarış-xilasetmə işlərini davam etdirir”.
