Hindistanın hər hansı təxribat cəhdi cavabsız qalmayacaq, Pakistan xalqı ordusunun yanındadır və lazım gələrsə, birlikdə mübarizə aparmağa hazırdır. Pakistanın dəmir yolları naziri Hənif Abbasi öz iqamətgahında Hindistanla bağlı son hadisələrə dair keçirdiyi mətbuat konfransında deyib.
Abbasi qeyd edib ki, Pakistanın müdafiə sistemləri tam hazır vəziyyətdədir və "Quri", "Qəznəvi", o cümlədən "Şahin" raketləri elə-belə istehsal edilməyib. O bildirib ki, əgər Hindistan bizim su təchizatımızı kəssə, biz onların hava təchizatını kəsəcəyik.
Hərbi-siyasi ekspert Həşim Səhrablı Sherg.az-a bildirib ki, dünyada bir sıra dövlətlər arasındakı münasibətlər ölkələrin yarandığı gündən indiyə qədər qarşıdurma müstəvisində davam edib:
“Hindistan və Pakistan da həmin ölkələrdəndir. Bu ölkələrin müstəqillik əldə etməsindən indiyə qədər razılaşmadıqları və sərhədlərin tam olaraq formalaşmadığı geosiyasi reallıqlar mövcuddur. Terrorun baş verdiyi Kəşmir ərazisi bunun bariz nümunələrindən biridir. Terror hücumundan sonra hazırda həmin dövlətlər arasında yeni qarşıdurmanın başlama ehtimalı yaranıb. Hindistan terroru Pakistanın təşkil etdiyini bildirir. Pakistan isə iddia edir ki, Hindistan tərəfi münaqişə formalaşdırmaq üçün zəmin hazırlayıb. Ədalətli istintaq nəticəsində hansı tərəfin haqlı olduğunu müəyyən etmək olar. Lakin terrorla bağlı ədalətli mövqeyin olacağını düşünmürəm. Çünki iki tərəf də öz maraqlarından çıxış edəcəklər. İndiki geosiyasi vəziyyət ondan ibarətdir ki, heç kəs, xüsusilə də Hindistan və Pakistan kimi böyük dövlətlər ilk atəş açan tərəf olmaq istəmirlər. Onsuz da bütün dünyada səbr tükənib və dövlətlər milli maraqlarını qorumaq üçün tətikdə dayanıblar. Belə olan halda atəşi ilk açan tərəf üçün nəticələr daha fəsadlı ola bilər. Ona görə də Hindistan və Pakistan hadisənin şokuyla hərəkət etməli, mövqeylərini göstərməlidirlər. Müəyyən müddət sonra mövcud fikir ayrılıqlarının səngiyəcəyini və hər iki tərəfin əvvəlki şərtlərlə xarici siyasətlərinə geri qayıdacağının şahidi olacağıq. Yəni bundan sonra münaqişələr davam etsə belə, müharibənin ehtimalı yoxdur”.
