Müharibələr və böhranlar zamanı investorlar sərvətlərini qorumaq üçün qızıla yönəlirlər
Son günlər qızılın qiyməti dünya bazarlarında yeni rekordlar qıraraq əhəmiyyətli dərəcədə bahalaşıb. Nyu-Yorkun COMEX əmtəə birjasında qızılın bir troya unsiyasının qiyməti 2,10 dollar artaraq 3 300,5 dollar təşkil edib. Gümüş isə 0,21 dollar azalaraq 33,12 dollara bərabər olub.Bu artım, qlobal iqtisadi qeyri-müəyyənliklər, xüsusilə ABŞ ilə Çin arasındakı ticarət gərginlikləri və inflyasiya gözləntiləri ilə əlaqələndirilir.Azərbaycan bazarında da qızılın qiymətində əhəmiyyətli artımlar müşahidə olunub.
35-40 faiz arasında bahalaşma qeydə alınıb. FED.az xəbərinə görə, son bir ayda qızılın qiyməti rekord dərəcədə qalxıb və bu artım bazarda alıcılıq qabiliyyətinin azalmasına səbəb olub. Qeyd edək ki, qızılın qiymətinin artması, investorların qeyri-müəyyənlik dövründə təhlükəsiz liman olaraq qiymətli metalı seçmələri ilə əlaqədardır. Analitiklər, qızılın qiymətinin yaxın aylarda da artmağa davam edəcəyini proqnozlaşdırırlar .
İqtisadçı - ekspert Natiq Cəfərli qızılın qiymətinin artmasını qlobal iqtisadi və geosiyasi qeyri-müəyyənliklərlə əlaqələndirib. O “Sherg.az”a açıqlamasında bildirib ki, müharibələr və böhranlar zamanı investorlar sərvətlərini qorumaq üçün qızıla yönəlirlər, çünki qızıl "güvənli liman" rolunu oynayır. Bu da qızılın qiymətinin yüksəlməsinə səbəb olur .
N. Cəfərlinin sözlərinə görə, ABŞ Mərkəzi Bankının (FED) faiz dərəcələrini aşağı salma ehtimalı da qızılın qiymətinin artmasına təsir edir. Çünki faiz dərəcələrinin aşağı düşməsi, investorları daha riskli aktivlərə yönəldir və bu da qızıla olan tələbi artırır:
“Azərbaycan bazarında da qızılın qiyməti dünya bazarındakı qiymətlərlə paralel olaraq dəyişir. Azərbaycanda qızılın qiyməti inflyasiya və mövsümi tələbatla əlaqədar olaraq dəyişə bilər. Düşünürəm ki, qızılın qiymətinin artması alıcılar və satıcılar üçün ciddi çətinliklər yaradır”
