Canlı yaddaşlarda Qərbi azərbaycanlıların Ermənistandan necə qovulduqları qalmaqdadır
Azərbaycan Prezidenti İlham Əliyev “İslamofobiya: qərəzin ifşa olunması və stiqmaların dağıdılması” adlı beynəlxalq konfrans iştirakçılarına ünvanladığı müraciətdə qeyd edib ki, Qərbi Azərbaycanda soydaşlarımızın doğma yurd-yuvalarından didərgin salınması ilə yanaşı, xalqımızın zəngin mədəni və mənəvi irsinə qarşı məqsədyönlü şəkildə məhvetmə və ya saxtalaşdırma siyasəti aparılır. Bu siyasət azərbaycanlıların həmin ərazilərdəki tarixi-etnik izlərini silməyə yönəlib. Prezidentin sözlərinə görə, bir neçə gün əvvəl Qafqaz Müsəlmanları İdarəsinin Qazılar Şurasının iclasında İrəvan qazılığının fəaliyyətinin yenidən bərpası ilə bağlı qəbul olunmuş qərar, Qərbi Azərbaycandakı dini və mədəni irsimizin dağıdılması faktlarını beynəlxalq ictimaiyyətin diqqətinə çatdırmaq və tarixi ədaləti bərpa etmək baxımından mühüm əhəmiyyət daşıyır.
Qərbi Azərbaycan İcmasının İdarə Heyətinin sədr müavini, millət vəkili Hikmət Babaoğlu Sherg.az-a söyləyib ki, Azərbaycan Prezidenti İlham Əliyevin “İslamofobiya: qərəzin ifşa olunması və stiqmaların dağıdılması” mövzusunda beynəlxalq konfransda Qərbi Azərbaycanda qalan dini, milli, maddi və mədəni irsimizlə bağlı ifadələri dilə gətirməsi tarixi reallığın təsbitidir:
“Eyni zamanda bu günkü siyasi çağırışların əsas istiqamətlərindən biridir. Nəticə etibarilə, bütün dünya Qərbi Azərbaycanın ölkəmizin etno-mədəni və dini-mədəni coğrafiyası olduğunu bilir. Qərbi Azərbaycan əraziləri tarixən Azərbaycana məxsus torpaqlardır. Həmin ərazilərdə ermənilərin məskunlaşması Qərbi azərbaycanlıların orada yaşamaması anlamına gəlmir. Hələ də canlı yaddaşlarda 1987-1991-ci illərdə yüzminlərlə Qərbi azərbaycanlıların Ermənistandan necə qovulduqları qalmaqdadır. Həmin ərazilərdə ev tikən və mədəniyyət yaradan insanların əlinin qabarı hələ getməyib. Belə olan da Qərbi azərbaycanlılar Ermənistanın bir parçası olduğunu necə inkar etmək olar? İlham Əliyevin keçirdiyi siyasət nəticəsində Qərbi azərbaycanlılar necə ki, Qərbi Azərbaycan torpaqlarının keçmişi idi, eləcə də, gələcəyi olacaqlar. Sadəcə olaraq bu tarixi mərhələdə sözügedən proses üçün milli gücümüzün bütün komponentləri ilə mübarizə aparmalıyıq. İrəvan qazılığının bərpa olunmasına Erməni Apostol Kilsəsinin sərt reaksiyası göstərir ki, yeni reallıqlar və həqiqət erməniləri narahat edir. Lakin tarixi ədalət mütləq bərpa olunmalıdır”.
