"Pakistanın Əfqanıstan ərazisindəki terrorçu qruplaşmalara qarşı həyata keçirdiyi cavab zərbələri müdafiə xarakteri daşıyır və dinc sakinlərə qarşı yönəlməyib".
Teleqraf xəbər verir ki, bu barədə Pakistanın Baş nazirinin müavini, xarici işlər naziri Məhəmməd İshaq Dar "X" hesabında paylaşım edib.
“Bizim müdafiə tədbirlərimiz Əfqanıstanın dinc vətəndaşlarına qarşı deyil. ‘Taliban’ qüvvələrindən fərqli olaraq, biz dinc sakinlərin həyatını itirməməsi üçün ən yüksək ehtiyatla hərəkət edirik.”
Darın sözlərinə görə, Pakistanın cavabı Əfqanıstan hakimiyyəti tərəfindən edilən “ciddi təxribat”a qarşı yönəlib və əsas məqsəd “Taliban”ın infrastrukturlarını hədəfə almaq, eləcə də Əfqanıstan ərazisində fəaliyyət göstərən “Fitna əl-Xavaric” (əvvəllər Pakistan Taliban Hərəkatı kimi tanınırdı) və “Fitna əl-Hindustan” kimi terrorçu elementləri zərərsizləşdirməkdir.
