“Bu birliyə qardaş Türkiyə başçılıq edəcək”
“Belə ssenari rəsmi Vaşinqton ABŞ-ın regionla bağlı geosiyasi maraqlarına uyğun deyil”
"Xüsusilə, ABŞ prezidenti ilə İsrail baş naziri arasında müzakirədən sonra hərbi əməliyyatların yaxın zamanda dayandırılması ehtimalı bir az da artıb”
İsrail və Fələstin arasındakı müharibə artıq təxminən on gündür ki, davam edir. Ölənlərin sayı günü-gündən artır. Ziddiyyətləşən proseslər isə qlobal xarakter daşıyır və dünya üçün yaxşı nə isə vəd etmir. Bir çoxlarının fikrincə, ən qısa zamanda tərəflər arasında atəşkəs əldə olunmasa, digər ölkələr də hərbi əməliyyatlara qoşulacaq.
Politoloq Natiq Miri isə düşünür ki, tədricən “sular durulacaq”. O, hadisələrin inkişafı barədə proqnozlarını “Sherg.az”la bölüşdü:
“Böyük müharibənin olacağını fikirləşmirəm. Çünki ABŞ artıq çəkisini ortaya qoyub. Rəsmi Vaşinqton anlayır ki, proseslər belə davam etsə, İsrailə qarşı koalisiya yaranacaq. Və bu birliyə qardaş Türkiyə başçılıq edəcək. Belə ssenari ABŞ-ın regionla bağlı geosiyasi maraqlarına uyğun deyil. Xüsusilə, ABŞ prezidenti ilə İsrail baş naziri arasında müzakirədən sonra hərbi əməliyyatların yaxın zamanda dayandırılması ehtimalı bir az da artıb. Fikrimcə, proseslər yavaş-yavaş səngiyəcək”.
N.Miri, həmçinin rəsmi Bakının baş verənlərə münasibətindən də danışdı:
“İsraillə Fələstin arasında konflikt 70 ildən çoxdur ki, davam edir. 1948-ci ildə xüsusilə Böyük Britaniyanın dəstəyi ilə İsrail bir dövlət kimi təşəkkül tapandan sonra Fələstinin 75 faizini işğal etdi. Bu, təkzibedilməz faktdır.
Lakin Fələstinin qlobal səviyyədə müstəqil subyekt kimi tanınmaması İsrailin əlində ona qarşı tutarlı geosiyasi alətdir. Təəssüf ki, İsrail Fələstin ərazisini işğal etməklə yerli əhalinin yaşamaq hüququnu tanımır. Və bu proses hələ də davam edir.
Eyni zamanda Azərbaycanın özünün də separatizmlə bağlı problemi var. İkinci bir tərəfdən, biz Vətən savaşı dövründə İsrailin dəstəyini unutmamalıyıq. Fələstin rəhbərliyinin həmişə Ermənistanla isti münasibətdə olduğu da kimsəyə sirr deyil.
Rəsmi Bakı bütün bu məqamları nəzərə alaraq ehtiyatlı davranmalı, proseslərə həssas yanaşmalıdır. Elə etməliyik ki, nə strateji müttəfiqimiz İsraili incik salaq, nə də qardaş Türkiyənin siyasətinə zidd addım ataq.
Deməli, iki dövlət arasında seçim etmək doğru deyil. Xüsusilə, Azərbaycanın mövqeyinin təsiredici amil olmadığını nəzərə almaq lazımdır. Bizim seçimimiz nələrisə dəyişə bilsə, bəlkə də, konkret bəyanat səsləndirmək olardı. İndiki halda isə yox”.
