Qəzzaya dəstək naminə 5 min insanı şəhid verən Livan, yüzlərlə insanını itirən Yəmən xalqını da unutmaq olmaz
İsrail ordusu Qəzzaya humanitar yardım aparmaq məqsədilə yola çıxan Qlobal Sumud flotilyasının gəmilərini dayandırıb. Gəmidəki aktivistlər İsrail limanlarından birinə aparılıb və bir neçə gün orada saxlanılıb. İlkin məlumata görə, İsrail qüvvələri ən azı 13 gəmini saxlayıb. Türkiyə mediası isə ümumilikdə 15 gəminin ələ keçirildiyini, saxlanılan türk fəalların sayının isə 25-ə çatdığını açıqlayıb. Bundan əvvəl yayılan məlumatlarda dörd gəminin dayandırıldığı və 70 fəalın saxlandığı bildirilmişdi.
Hadisə beynəlxalq aləmdə rezonans doğurub. Donanma təşkilatçıları İsrailin bu addımını "qanunsuz” adlandıraraq, sərnişinlərin zorla ələ keçirildiyini bildiriblər. İsrail Xarici İşlər Nazirliyi də məlumat yayıb ki, Sumud yaxtalarının heç biri aktiv döyüş zonasına daxil ola bilməyib və qanuni dəniz blokadasını yarmağa müvəffəq olmayıb: "Qəzzaya humanitar yardım daşıyan 171 aktivisti deportasiya edilib". Məlumata görə, deportasiya olunanlar arasında Yunanıstan, İtaliya, Fransa, İsveç, Polşa, Almaniya, Norveç, Böyük Britaniya, Bolqarıstan, Litva, Lüksemburq, Finlandiya, Danimarka, İsveçrə, Serbiya, ABŞ, Litva və Avstriya vətəndaşları var.
Araşdırmaçı-jurnalist Kənan Rövşənoğlu Sherg.az-a deyib ki, Qlobal Sumud donanmasının heç bir gəmisi Qəzzaya çatmasa da, bu səfər bir ibrət idi. Onun sözlərinə görə, dünyanın müxtəlif ölkələrindən 400 nəfərin gəmilər icarəyə götürərək Qəzzaya yardıma getməsi ciddi hadisədir:
"Çoxlu sayda xristian və Avropa insanı var idi. Bizdə bu donanmanın səfəri geniş şəkildə işıqlandırılmadı. Amma düşünürəm ki, bu səfər dünyada hələ də vicdanlı insanların olduğunu və onların bir araya gələ biləcəyini göstərən nümunə idi. Qəzzaya getmək istəyən insanlar dinindən, irqindən, millətindən asılı olmayaraq seçilmiş şəxslər idi. Məsələ Qəzzada deyil, Hacı Bektaş Vəlinin dediyi kimi, dini, dili nə olursa olsun, yaxşılar yaxşıdır. Qəzzaya dəstək naminə 5 min insanı şəhid verən Livan, yüzlərlə insanını itirən Yəmən xalqını da unutmaq olmaz. Dünya vicdanlı insanların sayəsində hələ də mövcuddur".
