Fransada yuxarı sinif şagirdlərinin ölkəboyu davam edən kütləvi etiraz aksiyaları fonunda 400-dən çox məktəbdə ənənəvi tədris prosesi oktyabrın 5-də bərpa olunmayacaq.
Teleqraf xəbər verir ki, bu barədə "TF1" telekanalı məlumat yayıb.
Məlumata əsasən, fəaliyyətini dayandıran təhsil müəssisələrinin təxminən 40 %-i (168 məktəb) paytaxtın İl-de-Frans regionunun payına düşür.
Fransanın təhsil naziri Eduar Jeffre bildirib ki, oktyabrın 2-də 400-dən 500-ədək məktəbdə dərslər dayandırılıb və böyük ehtimalla birinci gün bu göstərici dəyişməz qalacaq.
O əlavə edib ki, bu həftə baş verən iğtişaşlar zamanı 24 təhsil müəssisəsi yandırılıb və ya qarət edilib. Bununla belə, dərslərin xüsusilə buraxılış sinifləri üçün mərhələli və qismən bərpa olunması planlaşdırılır.
Qeyd edək ki, yuxarı sinif şagirdlərinin etirazları keçən həftə İl-de-Frans regionunda başlayıb və hazırda bütün ölkəni əhatə edib. Aksiyanın iştirakçıları dərs cədvəlinin həddindən artıq sıxlığına, müəllim çatışmazlığına və təhsil sistemindəki digər problemlərə etiraz edirlər. Bəzi bölgələrdə etirazlar iğtişaşlara və polislə toqquşmalara çevrilib. Son məlumatlara görə, 2 minə yaxın şəxs saxlanılıb, onların 1 800-ü həbs edilib.
