Gec-tez bu bölgəyə demokratiya gələcək
İran İslam Respublikası atom bombası yaratmaq ərəfəsindədir və bunun qarşısını almaq üçün nəsə etmək lazımdır.
Bu barədə ABŞ-nin 9 düşüncə mərkəzinin birgə bəyanatında xəbərdarlıq edilib.
“İslam Respublikası bir neçə gün ərzində bir neçə nüvə silahı istehsal etmək üçün lazım olan uranı istehsal edə bilər və bunun qarşısını almaq üçün təcili tədbirlər görülməli, Amerikanın növbəti prezidenti etibarlı hərbi variantları nəzərdən keçirməlidir”, - bəyanatda bildirilib.
Həmçinin bəyanatda dünyanın diqqətinin İsrail-HƏMAS müharibəsinə və 2024-cü ildə ABŞ-də keçiriləcək prezident seçkilərinə yönəldiyi bir vaxtda Tehranın davamlı və sakit şəkildə nüvə zənginləşdirmə fəaliyyətlərini artırdığı da qeyd olunub.
Politoloq Vasif Əfəndi isə “Sherg.az”a açıqlamasında deyib ki, İranın nüvə silahı əldə etmək cəhdləri və bu istiqamətdə işlərinin davam etdirilməsi barədə bəyanatlar yeni deyil və mütəmadi olaraq gündəliyə gətirilir:
“ABŞ-də prezident seçkisi öncəsi və İranda yeni hakimiyyətin formalaşması ərəfəsində bu sayaq bəyanatlar manevr və durumu test etmək məqsədi daşıyır. ABŞ tərəfi yeni seçilmiş İran prezidentinin fəaliyyət növünü müəyyən etməyə çalışır. Təbii ki, Qərb Pezeşkian ilə işləmək ümidindədir. Pezeşkian bir neçə il öncə çıxış və fəaliyyətini izləyərkən sanki adamın bu günlərdə hakimiyyətə gələcəyini hesablamış kimi görünür. Hadisə baş verib və İran dəyişikliyə hamilədir. Gec-tez bu bölgəyə demokratiya gələcəkdir. Hadisənin daha tez və ağrısız reallaşması üçün isə tarixi şərait yaranıb. İran müasirləşməli və türk dövlətləri sırasına qatılmalıdır. Bu, İranın varlığının qarantiyası olacaq”.
