“Rusiya dünyada, o cümlədən İranda kütləvi qırğın (nüvə nəzərdə tutulur - red.) silahlarının yayılmasının əleyhinədir”.
Bunu Rusiya Prezidenti Vladimir Putin deyib.
Həmçinin Rusiya lideri qeyd edib ki, Atom Enerjisi üzrə Beynəlxalq Agentlikdə (AEBA) İranın nüvə silahı yaratmağa cəhd etməsi barədə məlumat yoxdur.
Politoloq Əhəd Məmmədli Sherg.az-a bildirib ki, Putin demək istəyir ki, İran atom bombası istehsal etmir, onu niyə vurursuz?:
"Tehran bəyan edib ki, nüvə silahını yalnız təhlükəsizlik məqsədilə yaratmaq niyyətindədir. Üstəlik, bir çox ölkələr atom bombasına sahibdir, digərlərinə olmaz qanunu harada yazılıb? Əgər belədirsə, dünya ədaləti, beynəlxalq hüquqdan danışmamalıyıq. Bu gün İranda nüvə silahı olsaydı, İsrailin bu ölkəni vurmağa cəsarəti çatmazdı. Son illərdəki münaqişələr onu göstərdi ki, nə qədər çox ölkədə nüvə silahı, bir o qədər sülh, əmin-amanlıq deməkdir. Dünyada ən çox nüvə başlığı olan dövlətlərdən biri Rusiyadır. İranı sözdə müdafiə əvəzinə, ona silah verərək dəstəyini əməldə nümayiş etdirsin".
Politoloq qeyd edib ki, ABŞ vaxtilə İraqa, Əfqanıstana hücumu ilə beynəlxalq ədalətə ümumiyyətlə son qoydu:
"Hazırda isə Rusiya, İsrail həmin yolu davam etdirir. Odur ki, müsəlman ölkələri bütün bunlardan nəticə çıxarmalıdır. Başda Türkiyə olmaqla, nə qədər çox müsəlman dövləti nüvə silahı istehsal edərsə, təhlükəsiz cəhətdən güvəndə sayılarlar".
