Ukrayna Rusiya ilə bağlanacaq sülh müqaviləsi çərçivəsində öz suverenliyini məhdudlaşdırmağa razı olmayacaq.
Bu barədə Ali Radanın Beynəlxalq siyasət komitəsinin rəhbəri Aleksandr Merejko BBC-yə müsahibəsində bildirib.
Onun sözlərinə görə, Ukrayna mümkün sülh müqaviləsi ilə bağlı sərt mövqe tutur və üç əsas “qırmızı xətt” müəyyənləşdirir.
Birincisi, Ukrayna heç bir ərazi güzəştinə razı olmayacaq və bu məsələ müzakirə olunmur. İkincisi, Ukraynanın NATO və digər beynəlxalq təşkilatlara üzvlüyü məsələsində Putin Ukrayna əvəzinə qərar verməməlidir. Üçüncüsü, Kiyev Putinin Ukrayna ordusunun azaldılması tələblərinə razı ola bilməz.
Tanınmış jurnalist, politoloq Fuad Abbasov “Sherg.az”a söyləyib ki, hər iki tərəf yetərli qədər itki verib və kifayət qədər təcrübə qazanıb:
“Ukrayna və Rusiya tərəfi müharibəni davam etdirməyin mənasız olduğunu başa düşür. Çünki Rusiyanın milyardlarla dövlət büdcəsini xərcləyərək hazırladığı təyyarə bombaları və hərbi təchizatını Ukrayna ilə müharibədə istifadə etməkdən çəkinir. Buna görə də Rusiya liderinin Ukraynanın silahsızlaşdırılması yönündə tələbləri təbii ki Kiyev tərəfindən qəbuledilməzdir. Çünki bu qədər qan tökdündən sonra Ukrayna hər cəbhədən müharibəni uduzmaqla üz-üzə qalacaq. Bütün bunlar isə Zelenski ilə bərabər Ukrayna ictimaiyyətinin də qarşı gəldiyi məqamdır. Ona görə də yalnız Ukraynanın Avropa Birliyi və NATO-ya üzvlüyü təxirə salmaq, eyni zamanda ələ keçirilən torpaqların saxlanılması şərtiylə sülh imzalana bilər. Rusiyanın buna razı olub-olmayacağı sual altındadır. Həmçinin Ukraynanın Krım daxil olmaqla Luqansk və Donetsk Rusiya tərəfindən ələ keçrilməsinə razı olacağı da bəlli deyil. Burada Donald Trampın nüfuzu işə yaraya bilər. Donald Tramp Rusiya və Ukrayna tərəfinə sanksiyalar və digər vasitələrlə təsir göstərməklə sülhün bağlanmasında maraqlı tərəflərin tələblərinə uyğun razılaşma imzalada bilər”.
