Rusiya Pravoslav Kilsəsi Ermənistan Baş naziri Nikol Paşinyanı Ermənistan Apostol Kilsəsinə qarşı təhdid və təzyiqlərlə çıxış etməklə konstitusiya səlahiyyətlərini aşmaqda ittiham edib.
Teleqraf xəbər verir ki, bu barədə Moskva və bütün Rusiyanın Patriarxı Kirillin müşaviri, protoierey Nikolay Balaşov "RIA Novosti"yə açıqlamasında bildirib.
Onun sözlərinə görə, Ermənistan qanunvericiliyinə əsasən, kilsə dövlətdən ayrıdır və xalq ona böyük hörmətlə yanaşır:
"Erməni xalqı Nikol Paşinyana kilsəni öz istəklərinə uyğun şəkildə islahat etmək səlahiyyəti verməyib. Dünyəvi dövlətin siyasi rəhbəri kilsə həyatının daxili quruluşuna qarışmaq hüququna malik deyil. Ermənistan Konstitusiyası dini təşkilatların azad fəaliyyətini təmin edir və onların müstəqil, dövlətdən ayrı olduğunu açıq şəkildə vurğulayır".
Rusiya Pravoslav Kilsəsinin nümayəndəsi əlavə edib ki, dövlət rəhbərlərinin dini qurumlara müdaxilə cəhdləri kilsənin kanonik prinsiplərinə ziddir və cəmiyyətdə parçalanmaya səbəb ola bilər.
Qeyd edək ki, Ermənistanın Apostol Kilsəsi ilə respublika hökuməti arasında münasibətlər Nikol Paşinyanın hakimiyyətə gəlişindən və Qarabağın Azərbaycana məxsus olduğunu bəyan etməsindən sonra gərginləşib. Bir müddət öncə, bütün ermənilərin ali patriarxı və katolikosu II Qaregin erməni kilsəsinin Nikol Paşinyanın istefası ilə bağlı çağırışından imtina etmədiyini demişdi.
