ABŞ Prezidenti Donald Tramp, administrasiyasının 11 sentyabr 2001-ci il terror aktları ilə bağlı əlavə məxfi məlumatları açıqlaya biləcəyini bildirib.
APA xəbər verir ki, Tramp bu barədə İrlandiyadan ABŞ-a yola düşməzdən əvvəl jurnalistlərin suallarını cavablandırarkən danışıb.
“Geri qayıdanda buna baxacağam. Bu məsələ ilə bağlı mənə müraciət edildiyini bilirəm. Qayıtdıqdan sonra araşdıracağam”, - Tramp deyib.
Qeyd edək ki, sentyabrın 11-də ABŞ Mərkəzi Kəşfiyyat İdarəsi (MKİ) 2001-ci il terror aktları ilə bağlı əvvəllər məxfi saxlanılan sənədləri açıqlayıb. Söhbət 1998-ci ilin fevralından 2001-ci ilin sentyabrına qədər olan dövrü əhatə edən, ABŞ prezidentləri üçün hazırlanmış 71 kəşfiyyat məlumatı xülasəsindən gedir. Ümumilikdə 101 səhifə açıqlanıb və sənədlərin bir hissəsi redaktə olunub.
