Türkiyənin Rusiya və İran boru kəməri qazını yerli istehsal və ABŞ-dan gələn mayeləşdirilmiş təbii qazla (LNG) əvəz etməyi sürətləndirməsi Tehranın son böyük Avropa ixrac bazarını daralda bilər. Ankara 2028-ci ilə qədər LNG hasilatını və idxalını genişləndirməklə, İran və Rusiyadan tədarükü kəskin şəkildə azalda bilər.
Axar.az xəbər verir ki, bu barədə “Röyters”də dərc edilən analitik məqalədə bildirilib.
Xatırladılıb ki, İran hazırda Türkiyəyə 2026-cı ilin ortalarında başa çatacaq müqaviləyə əsasən ildə təxminən 10 milyard kubmetr qaz tədarük edir:
“Ankara daha çox çeviklik və diversifikasiyaya can atdığından, çətin ki, müqaviləni eyni şərtlərlə yeniləsin. Bu addım Türkiyənin Energetika Nazirliyinin yerli qaz hasilatını artırması və ABŞ və Əlcəzairdən çoxmilyardlıq LNG idxalı müqavilələri imzalaması ilə bağlıdır.
Hesablamalara görə, Türkiyənin yerli istehsalı və müqavilə əsasında LNG idxalı 2028-ci ilə qədər ildə 26 milyard kubmetri keçəcək. Bu isə ildə 53 milyard kubmetr təxmin edilən qaz ehtiyacının yarısından çoxunu ödəməyə kifayət edəcək. 27 milyard kubmetrlik idxal kəsiri qalacaq ki, bu da hazırda Rusiya, İran və Azərbaycandan müqavilə ilə alınan 41 milyard kubmetrdən xeyli aşağı olacaq.
Türkiyə İran və Rusiya da daxil olmaqla, bütün mövcud tədarükçülərdən qaz almağa davam edəcəyini iddia etsə də, onun uzunmüddətli strategiyası sabit boru kəməri müqavilələrindən daha çox çevik LNG alışına yönəlib”.
Qeyd edək ki, ABŞ lideri Donald Tramp Türkiyəni Rusiyadan neft və qaz alışını dayandırmağa çağırmışdı.
