Polşa Baş naziri Donald Tusk ABŞ Prezidenti Donald Tramp və Macarıstan Baş naziri Viktor Orbanın son bəyanat və addımlarını “Putinin arzusundakı plan” adlandırıb.
Teleqraf xəbər verir ki, bu barədə o, X-də yazıb.
Donald Tusk hesab edir ki, son hadisələr Rusiyanın xeyrinədir.
“NATO-nun dağılması təhlükəsi, Rusiyaya qarşı sanksiyaların yumşaldılması, Avropada genişmiqyaslı enerji böhranı, Ukraynaya yardımın dayandırılması və Orbanın Kiyev üçün kreditin qarşısını alması - bütün bunlar Putinin arzusundakı plana bənzəyir”, - Polşa Baş naziri bildirib.
Xatırladaq ki, Donald Tramp bundan öncə müttəfiqlərin ABŞ-nin İrana qarşı hərbi əməliyyatlarını dəstəkləməməsindən sonra ölkəsinin NATO-dan çıxmasını ciddi şəkildə nəzərdən keçirdiyini açıqlayıb.
ABŞ-nin NATO-dakı daimi nümayəndəsi Metyu Uitaker isə bildirib ki, Tramp hazırda Amerikanın Avropanın Ukraynaya yardım səylərinə dəstəyini yenidən qiymətləndirir.
