Qərb SSRİ-ni Əfqanıstanda məğlub etdiyi kimi Ukraynada da məğlub edəcək
"Ukrayna Silahlı Qüvvələrinin Rusiya hərbi obyektlərinə, o cümlədən raket hücumu barədə xəbərdarlıq sisteminə hücumlarına Moskvanın cavabı asimmetrik ola bilər". Bu barədə jurnalistlərə Rusiyanın xarici işlər nazirinin müavini Sergey Ryabkov məlumat verib. O bildirib ki, cavablar asimmetrik ola bilər: "ABŞ-nin bununla bağlı mövqeyinə gəlincə, bu, məsuliyyətsizlikdir. Onlar Kiyevə hər hansı cinayətə, bu qəbildən olan addıma görə indulgensiya veriblər. Bu ittihamların qarşısını almaq üçün heç nə etmirlər. ABŞ-nin özünə də bu müharibə baha başa gələcək və nəticələrini də hiss edəcək".
Politoloq Məhəmməd Əsədullazadə "Sherg.az"ə deyib ki, Rusiya-Ukrayna müharibəsi qlobal təhlükəsizliyi təhdid edir. Ekspertin sözlərinə görə, Rusiyanın Ukraynaya hərbi hücumu dünyada yeni siyasi münasibətlər sistemində dərin böhran yaradıb:
"Bu böhran dünyanın siyasi və təhlükəsizlik arxitekturasına mənfi təsir edərək, bir çox ölkələrin müstəqilliyinə təhdid yaradıb. Xüsusilə, Şərqi Avropa ölkələri və və post-sovet məkanı Moskvanın aqressiv siyasəti ilə üzləşib. ABŞ və NATO Ukraynada Rusiyanın hərbi işğalını durdurmasa, Moskva Avrasiya İttifaqını de-yure siyasi ittifaq edərək, qonşu ölkələri bu birliyə hərbi təzyiqlər yolu ilə üzv edəcək. Baş verənlər onu göstərir ki, Rusiya fövqəldövlət olmağa, təsir dairəsini formalaşdırıb, Qərbi uzaq tutmağa çalışır. Davam edən böhranlı sistem və bundan sonrakı siyasi proseslərdə ancaq ABŞ və NATO post-sovet ölkələrinin müstəqilliyinin qarantı olacaq. Rusiya müdafiə nazirinin NATO-nun Cənubi Qafqazda və MDB məkanında təsir dairəsini inkişaf etdirməsinə sərt mövqe bildirməsi regionun Moskvanın təsir dairəsinə daxil olduğu mesajının verilməsidir. Rusiya Cənubi Qafqazdan və Mərkəzi Asiya regionundan getməməyə çalışır. Ukraynada qalib gəlmək Moskva üçün strateji önəm daşıyır və fövqəldövlət olmasını şərtləndirir. Bunun üçün Rusiya Ukraynada nüvə silahı tətbiq etməyə də gedə bilər. Amma Qərbin adekvat cavabı Moskvanı çəkindirir. Ukraynada müharibə yeni mərhələyə keçir. Qərb SSRİ-ni Əfqanıstanda məğlub etdiyi kimi Ukraynada da məğlub edəcək".
