Alimlər bildirirlər ki, əgər yeni bir “Nuhun Gəmisi” inşa olunmasa, insanlığın sonu gələ bilər.
Sherg.az xəbər verir ki, “Wion News”in məlumatına görə, Harvard Universitetindən məşhur astrofizik Avi Loeb insanlığın taleyinə dair ciddi xəbərdarlıq edib. Loebə görə, dünyada baş verəcək böyük fəlakət insanları sağ qalmaq üçün kosmosa qaçmağa məcbur edəcək.
Loeb deyib: “Bir gün, ölüm və fəlakətdən xilas olmaq üçün “Nuhun Gəmisi” bu dəfə göy üzündə qurulacaq.” İnsanlıq yeni başlanğıcı Yer üzündən kənarda axtarmalı olacaq.
Məşhur alim insanlardan daha ağıllı sivilizasiyaların ola biləcəyinə diqqət çəkib: “İnsanlar özlərini kainatdakı ən ağıllı varlıq sanaraq böyük səhv edirlər.” Loeb vurğulayıb ki, elm hələ “kəşf edilməmiş sahələri” araşdırmaqda ehtiyatlıdır və bu məhdud düşüncə insanlığın kosmosda mövcud ola biləcək yad sivilizasiyaların izlərini tapmasını əngəlləyir.
Loeb bloqunda yazır ki, insanlıq yalnız Yer üzündəki “əməliyyat sahəsi” ilə məhdudlaşıb, halbuki kosmos kəşfi gözləyən sonsuz imkanlar təqdim edir: “Kosmik zaman və məkan, Yer üzündəki təcrübələrimizin çox kənarında yaşam şəraiti təklif edir.” Ulduzlararası kosmosda hələ kəşf edilməmiş bir çox fürsət gizlənib. Loebə görə, insanlığı yox olmağa sürükləyəcək fəlakətlər arasında iqlim dəyişikliyi, süni intellekt, nəhəng asteroidin çarpması və ya yad texnologiyalar ola bilər. Bu halda su üzərində deyil, kosmosda üzən nəhəng “Nuhun Gəmisi” insan növünün sağ qalmasını təmin edə bilər.
