Ekspertlər hesab edir ki, əslində, Ermənistanın bu təxribatları Azərbaycan üçün fürsətdir
Bunun qarşısını almaq, yəni aqressoru sülhə təhrik etmək üçün ilk növbədə İrəvan hökumətinə sərt ultimatum verilməlidir
“Yerkrapa” terror təşkilatı Ermənistan-Azərbaycan şərti sərhədindəki döyüş mövqelərinə yeni terrorçular göndərib. Bildirilib ki, silahlı qruplaşmanın sıralarında Azərbaycana qarşı müharibələrdə iştirak etmiş terrorçular var. Həmçinin, separatçı əski parçasını qoluna yapışdıranlar da ortaya çıxıb. Bu addımlar regionda sülh və sabitliyə ciddi təhdid yaradır. Ermənistanın “sülh” açıqlamaları ilə bu amillər birbaşa ziddiyyət təşkil edir. Belə terrorçuların mövqelərə yerləşdirilməsi açıq təxribatdır. Təxribatın və qanunsuz hərbi fəaliyyətin bütün məsuliyyəti Ermənistan hərbi-siyasi rəhbərliyinin və onu dəstəkləyən qüvvələrin üzərindədir. İrəvan erməni ordusuna aid olmayan terrorçulara dəstək verməklə bərabər onları sərhədlərimizə göndərirsə, deməli, Ermənistan kövrək regional sabitliyi pozmaqda maraqlıdır. Bəzi ekspertlərin fikrincə, Ermənistanın demillitarizasiyası, əldə etdiyi silahlardan imtina etməsi ilə paralel şəkildə həyata keçirilməlidir.
AĞ Partiya sədrinin müavini Əhəd Məmmədli "Sherg.az"a açıqlamasında deyib ki, əslində, Ermənistanın bu təxribatları Azərbaycan üçün fürsətdir. Ekspert vurğulayıb ki, əgər Baş nazir Nikol Paşinyan öz ölkəsinin sərhədlərinə, ordusuna, ümumiyyətlə, dövlətə nəzarət edə bilmirsə, bir qrup terrorçunun öhdəsindən gələ bilmirsə, deməli, Ermənistan aqressor mahiyyətindən əl çəkməyib:
"Bunlar Azərbaycanın dövlət və sərhəd təhlükəsizliyinə açıq-aşkar təhdiddir. Bunun qarşısını almaq, yəni aqressoru sülhə təhrik etmək üçün ilk növbədə İrəvan hökumətinə sərt ultimatum verilməlidir. Ya həmin terrorçuları özləri neytrallaşdırmalı, birdəfəlik köklərini kəsməli, zərərli fəaliyyətlərinə son qoymalıdır, yaxud da Azərbaycan bütün şərti sərhəd boyu "tanpon bölgə" quracaq. İsrail öz təhlükəsizliyi üçün necə neytral zonalar təşkil edirsə, biz də edə bilərik. Düzdür, fələstinlilərə qarşı qətliam törədən İsraillə Azərbaycanı müqayisə yanlışdır. İsrail insanların başına bomba yağdırır, biz isə erməniləri Qarabağdan duz-çörəklə yola saldıq. Sadəcə, mövcud presedentləri xatırlatmaq üçün İsraili misal çəkdim".
Ə.Məmmədli xatırladıb ki, Ermənistan özü də vaxtı ilə Xankəndi və ətrafındakı rayonlarımızı işğal etməklə həmin bölgəni "tampon bölgə" elan etmişdi:
"Ona görə də Göyçə gölü daxil olmaqla 1918-ci ilin xəritələrinə uyğun təhlükəsiz xətt təşkil etməliyik. Çünki İrəvanın bir yandan sülhdən danışması, digər tərəfdən sərhədimizə terrorçuları, silahlı dəstələri yığması qəbuledilməzdir. Xüsusən, məhv olmuş qondarma rejimin əski parçalarını yenidən diriltmək yolverilməzdir. Erməniləri onların başa düşdüyü dildə başa salmaq lazımdır. Ermənilər bizim çəkdiyimiz ağrı-acını çəkməsələr ağıllanmayacaqlar. Onsuz da bizim olan Zəngəzuru, Göyçəni nəzarətə götürməliyik ki, İrəvana qaçqını başlasın".
