Şimali Koreya ilk dəfə olaraq Ukrayna ilə müharibədə döyüşmək üçün Rusiyaya qoşun göndərdiyini təsdiqləyib.
Bu barədə Koreya Mərkəzi Xəbər Agentliyi məlumat yayıb.
“Qoşunların göndərilməsi iki ölkə arasında hərtərəfli strateji tərəfdaşlıq sazişinə uyğun olaraq Şimali Koreya lideri Kim Çen İnin göstərişi əsasında həyata keçirilib. Ukrayna hakimiyyətinin Rusiyaya avantürist işğalını dəf etmək üçün Kursk vilayətinin azad edilməsi əməliyyatları qələbə ilə başa çatıb. KXDR silahlı qüvvələrinin bölmələri dövlət başçısı Kim Çen İnin əmrinə uyğun olaraq əməliyyatlarda iştirak edib”, - qeyd olunub.
Qeyd edək ki, Rusiyanın “Kremlyovskaya Tabakerka” kanalı Kursk vilayətində Şimali Koreyanın 8500 hərbçisinin öldüyünü, 11 min nəfərin isə yaralandığını yazmışdı.
Siyasi şərhçi Əziz Əlibəyli Sherg.az-a bildirib ki, son zamanlar Qərbin qüvvələrini zəiflətmək məqsədilə Koreya yarımadasında kiçikmiqyaslı toqquşmaların baş vermə ehtimalı müzakirəyə çıxarılıb:
"Xüsusilə 38-ci paralelin həm şimalında, həm də cənubunda orduların cəmləşməsi bu ehtimalları daha da gücləndirib. Əgər belə bir ssenari reallaşsaydı, Qərb, xüsusən də ABŞ və müttəfiqləri Ukrayna cəbhəsində topladıqları birləşmələrin müəyyən hissəsini Cənubi Koreyanın müdafiəsi üçün Koreya yarımadasına yönləndirmək məcburiyyətində qala bilərdi.
Bu konteksdə Şimali Koreyanın Rusiya ilə hərbi müttəfiqlik əlaqələri xüsusi əhəmiyyət kəsb edir. Şimali Koreya bir tərəfdən Rusiyanın yalnız olmadığını nümayiş etdirmək, digər tərəfdən isə limitsiz insan resursu ilə ona dəstək vermək üçün Ukrayna cəbhəsinə canlı qüvvə göndərməsi təəccübləndirici deyil. Çünki bu gün Şimali Koreyanın malik olduğu silah və ballistik raket imkanlarının formalaşmasında Rusiyanın rolu danılmazdır. Bütün bu faktlar göstərir ki, Moskva ilə Pxenyan arasında təhlükəsizlik sahəsində artan əməkdaşlıq təbii və gözlənilən bir prosesdir".
