İngiltərədə aparılan bir araşdırmaya görə, qanunsuz, parlaq rəngli elektron siqaret mayeləri TikTok, Facebook və Instagram-da reklam olunur və gəncləri hədəf alır.
Sherg.az "ntv.com.tr"yə istinadən xəbər verir ki, yeni araşdırma göstərib ki, İngiltərədə məktəblərdə müsadirə olunan elektron siqaretlərin 10 faizdən çoxunda “spays” adlı sintetik narkotik aşkar edilib.
"Sky News"un məlumatına görə, 114 məktəbdən götürülən təxminən 2 min elektron siqaret Bath Universitetində test olunub. Bəzilərində “spays” adlanan narkotik maddənin miqdarı 13 faizə çatıb.
Qanunsuz, əsasən parlaq rəngli elektron siqaret mayeləri İngiltərədə qadağan olunmuş marixuananın psixoaktiv komponenti THC kimi təqdim olunur. Lakin əksəriyyəti istehsalı daha ucuz olan “spays”dan hazırlanır.
Araşdırmaya rəhbərlik edən professor Kris Padni, bu narkotikin inanılmaz dərəcədə güclü və asılılıq yaradan olduğunu bildirib:
“Belə bir narkotikdən istifadə gəncləri sıxıntıya, istismara və ya daha çox cinayət törətmə riskinə məruz qoyur ki, bu da olduqca təhlükəlidir.”
Bu nəticələr, ötən il universitetin sınaqdan keçirdiyi kiçik bir nümunədən sonra təsdiqlənib. Həmin nümunə məktəblilərin istifadə etdiyi elektron siqaretlərin içində spays olduğunu ilk dəfə üzə çıxarmışdı.
Universitet həmçinin vizual analizlər apararaq sosial şəbəkələrdə satılan elektron siqaret mayelərinin THC, yoxsa spays tərkibli olmasını araşdırıb. Professor Padni bildirib ki, gənc auditoriyanın daha çox olduğu platformalarda spays nisbəti yüksəkdir: TikTok-da 67,5%, Instagram-da 54,2%, Facebook-da isə 12%.
O əlavə edib:
“Gənclərin bu narkotiklə hədəfə alınmasının səbəbi, onun ucuz olmasıdır. Çox ucuzdur və tapmaq da asandır, çünki cəmiyyətdə hər yerdə geniş yayılıb.”
