İsrail Baş naziri Benyamin Netanyahu dünən ABŞ Prezidenti Donald Tramp ilə Vaşinqtondakı Ağ Evdə bir araya gəlib.
Sherg.az xəbər verir ki, Trampın xarici siyasət üzrə nümayəndəsi Stiv Vitkoff bildirib ki, danışıqlarda əhəmiyyətli irəliləyiş əldə olunub və həftəsonuna qədər Qəzzadə atəşkəs sazişinə nail olunacağına ümid var.
Netanyahu, Tramp ilə ikinci görüşlərinin əsas mövzusunun girovların azad olunması olduğunu deyib.
Netanyahu görüşdən sonra yayımlanan videoda belə deyib:
“Bütün məqsədlərimizə çatmağa qərarlıyıq: həm sağ, həm də həyatını itirmiş bütün girovların azad olunması, Həmasın hərbi və idarəetmə gücünün sıradan çıxarılması və Qəzzənin artıq İsrail üçün təhlükə mənbəyi olmamasının təmin edilməsi.”
O həmçinin ABŞ-ın vitse-prezidenti JD Vance ilə də qısa bir görüş keçirdiyini bildirib.
Qətər nümayəndə heyəti də Ağ Evdə yüksək səviyyəli ABŞ rəsmiləri ilə görüş keçirib. Məlumata görə, tərəflər arasındakı dörd əsas problemli maddədən yalnız biri qalıb və bu həftənin sonuna qədər 60 günlük atəşkəsə dair razılıq əldə olunacağı gözlənilir.
Danışıqlar çərçivəsində 10 nəfər sağ və 9 nəfər həlak olmuş girovun təhvil veriləcəyi planlaşdırılır.
"60 gündən sonra müharibə yenidən başlamayacaq"
Atəşkəs müzakirələri davam etsə də, İsrail Qəzzəni bombalamaqda davam edir və Netanyahunun ABŞ səfərinə qarşı etirazlar keçirilir.
İsrail ordusunun geri çəkiləcəyi ərazilərlə bağlı xəritələrin hazır olduğu, atəşkəsin ilk günü Qəzzanın şimalından, yeddinci günü isə cənubundan geri çəkilmənin nəzərdə tutulduğu bildirilir.
Həmas isə atəşkəsin 60 gün sonra bitəcəyi halda İsrailin birtərəfli qaydada müharibəyə yenidən başlamayacağına dair zəmanət tələb edir.
Yüzdə 80-90 faiz razılaşdırılıb
İngiltərənin "Sky News" kanalı bildirib ki, humanitar yardım bölgələrinin nə Həmasın, nə də İsrailin nəzarətində olmayan üçüncü tərəflər vasitəsilə təmin edilməsi nəzərdə tutulur.
İsrailli rəsmilər danışıqların 80-90 faizinin razılaşdırıldığını, lakin müharibəyə son qoyacaq əsas məsələnin hələ də həll edilmədiyini bildiriblər.
