Azərbaycanın Ermənistan üçün Yerasxdan İrana gedən yolu artıq indi açmasına heç nə mane olmur, lakin bununla bağlı siyasi qərar yoxdur. Sherg.az xəbər verir ki, bunu politoloq Beniamin Poqosyan APRI Forum 2026 çərçivəsində TRIPP layihəsi və Qars-Naxçıvan dəmir yolunun tikintisini şərh edərkən deyib.
APRI Armenia analitik mərkəzinin baş elmi əməkdaşının sözlərinə görə, Ermənistanın blokadadan çıxması üçün ilk növbədə Ankara və Bakının sərhədlərin açılması ilə bağlı siyasi qərar qəbul etməsi lazımdır.
Poqosyan bildirib ki, Yerevan Mərkəzi Asiyadan Naxçıvana daxil olan yüklərin bir hissəsinin birbaşa Türkiyəyə deyil, Ermənistan ərazisindən - Yerasx, Yerevan və Gümrü üzərindən Qarsa daşınmasında maraqlıdır.
Onun sözlərinə görə, bunun üçün iki şərt - Ermənistan-Naxçıvan və Ermənistan-Türkiyə sərhədlərinin açılması tələb olunur.
“Bütün bunların Türkiyə və Azərbaycanın qəbul etməli olduğu siyasi qərarlar olduğu aydındır. Onların bu qərarları qəbul edib-etməyəcəyindən danışa bilmərəm, amma hələlik bunun baş verəcəyinə dair aydın istək və zəmanət görmürəm”, - deyə politoloq bildirib.
Poqosyan qeyd edib ki, uyğun siyasi qərar qəbul edilsəydi, sərhədlər artıq indi açıla bilərdi. Onun sözlərinə görə, Yerasxdan Naxçıvan sərhədinə qədər məsafə cəmi 1,5 kilometrdir və Yerevan-Yerasx dəmir yolu fəaliyyət göstərir.
Politoloq Azərbaycanın sərhədin Ermənistan Konstitusiyasında dəyişikliklər edilməyənədək açılmayacağı ilə bağlı mövqeyinə də diqqət çəkib. O hesab edir ki, Konstitusiyaya dəyişiklik prosesi uzana və ya başa çatmaya bilər və nəticədə sərhədlərin bağlı qalmasına görə məsuliyyət Ermənistan tərəfinin üzərinə qoyula bilər.
Poqosyan TRIPP layihəsinin Ermənistanın Sünik vilayətindən keçən strateji tranzit marşrutunun yaradılmasını nəzərdə tutduğunu da bildirib. Layihə çərçivəsində Azərbaycanın Naxçıvanla quru əlaqəsinin təmin edilməsi planlaşdırılır.
