“Ermənistanın bundan sonrakı iddiaları da əsassızdır. Erməni hüquqi sənədlərinin hamısı içi boşdur”
Beynəlxalq Ədalət Məhkəməsi (BƏM) Ermənistanın Azərbaycana qarşı 10 iddiasından 7-ni rədd edib. Məhkəmə Azərbaycanın Qarabağ üzərində suverenliyini və ərazi bütövlüyünü təsdiqləyib. Həmçinin, Azərbaycanın hərbi və hüquq-mühafizə orqanlarının Qarabağ bölgəsindən çıxarılması ilə bağlı əsassız və gülünc tələbini rədd edib.
BƏM Azərbaycan hökumətinin Qarabağın erməni sakinləri ilə bağlı artıq bəyan olunmuş siyasətini qəbul etdiyini açıqlayıb. Bu, milli və ya etnik mənşəyindən asılı olmayaraq bütün sakinlərin təhlükəsizliyini və mühafizəsini təmin etmək barədə öhdəliyimizi əhatə edir. Məhkəmə Ermənistanın BMT agentliklərinin Qarabağ bölgəsinə səfəri və Beynəlxalq Qızıl Xaç Komitəsi (BQXK) ilə əməkdaşlıq barədə iddiasına əhəmiyyət verməyib. Bununla da, beynəlxalq təşkilatların bölgəyə girişi ilə bağlı ölkəmizə qarşı bütün iddiaları mahiyyətcə əsassız edib. Məhkəmənin Azərbaycan tərəfindən mədəniyyət abidələrinin və artefaktlar ilə bağlı Ermənistanın iddialarını rədd etməsi Azərbaycanın həyata keçirdiyi müsbət tədbirlərin təsdiqidir. Eyni zamanda məhkəmə müvafiq ittihamlarla saxlanılan qanunsuz separatçı rejimlə əlaqəsi olan şəxslərlə bağlı Ermənistanın iddiasını eyni şəkildə təmin etməyib.
Millət vəkili Fazil Mustafa "Sherg.az"a deyib ki, Beynəlxalq Ədalət Məhkəməsində oturan hakimlərin məsələyə yanaşması önəmlidir. Deputatın sözlərinə görə, BƏM hakimlərinin əksəriyyəti real faktlara dayanaraq qərarlar qəbul edirlər:
"Təbii ki, zaman-zaman hansısa formada siyasi tapşırıq, yaxud təzyiqlərin olması mümkündür. Amma bunu açıq şəkildə etmirlər. Reallıq odur ki, bölgədə gedən proseslərlə bağlı qərar qəbul etmək, yəni qeyri-obyektiv yanaşma sərgiləmək elə də asan məsələ deyil. Çünki elə olarsa, hakimin reputasiyasına ciddi ziyan dəyər. Faktiki olaraq Ermənistan tərəfinin BƏM-də qaldırdığı iddiaların ciddi əsasları yoxdur. İddia varsa, real faktı əks etdirməlidir. Ancaq ortada heç bir fakt yoxdur. O baxımdan Məhkəmə obyektiv qərar verir. Ermənistanın bundan sonrakı iddiaları da əsassızdır. Erməni hüquqi sənədlərinin hamısı içi boşdur. ABŞ və ayrı-ayrı dövlətlər ermənilərə dəstək verməklə, onları həvəsləndirməklə bu yola sövq edirlər. Elə problemlər də buradan qaynaqlanır. Bu məsələləri hansısa formada diktə etmək mümkün deyil".
