Fransa Prezidenti Emmanuel Makron Cənub-Şərqi Asiya turuna Vyetnamdan başlayıbl. Təyyarədən enərkən yayımlanan görüntülərə əsasən, Makron Vyetnama çatdıqda həyat yoldaşı Briqit Makronla bir mübahisə yaşayıb.
Görüntülərdə Briqit Makronun Fransa Prezidentinin üzünə fiziki müdaxilə etdiyi görünür.
"Associated Press" xəbər agentliyi tərəfindən dünən axşam Hanoyda çəkilən kadrlarda, təyyarənin qapısı açılar-açılmaz Makron görünür. Bir neçə saniyə sonra həyat yoldaşının qolları kadra daxil olur və Makronun üzünə müdaxilə etdikdən sonra onu itələyir.
Nə baş verdiyini anlamayan və sanki diksinmiş kimi görünən Makron dərhal özünü toparlayır və açılan qapıya əl yelləmək üçün geri dönür.
Briqit Makronun üzü isə təyyarənin arxa tərəfində qaldığı üçün görünməyib.
Cütlük Vyetnamlı rəsmilər tərəfindən rəsmi qarşılanmaq üçün nərdivanlardan enərkən, Briqit Makron həyat yoldaşının uzatdığı əli tutmayıb.
Video internetdə sürətlə yayıldıqdan sonra Makronun ofisi əvvəlcə görüntülərin həqiqiliyini inkar edib, daha sonra isə onların həqiqi olduğunu təsdiqlənib.
Makronun yaxın bir dostu sonradan hadisəni cütlük arasında zərərsiz "ağız davası" kimi xarakterizə edib.
Prezidentin ətrafından başqa bir şəxs isə hadisənin əhəmiyyətini kiçik göstərib.
İkinci mənbə jurnalistlərə belə deyib: “Prezident və həyat yoldaşı səfərə başlamazdan əvvəl zarafatlaşaraq gərginliyi atdıqları bir an idi.”
“O, birlik anı idi. Qeyri-real nəzəriyyələr uyduranlar üçün bundan artığı lazım deyildi” deyən mənbə, hadisə ilə bağlı neqativ şərhlərə görə Rusiyapərəst hesabları günahlandırdı.
Vyetnam, Makronun Fransanı ABŞ və Çinə qarşı etibarlı alternativ kimi təqdim edəcəyi və təxminən bir həftə davam edəcək Cənub-Şərqi Asiya turunun ilk dayanacağıdır.
